Aldamjarov: Qalalarda gazondar men aǵashtardy tazartylǵan aǵyn sýlarmen sýarýǵa bolady
ASTANA. KAZINFORM — Qalalardaǵy kógaldar men jasyl jelekterdi sýarý úshin tazartylǵan aǵyn sýlardy paıdalanýǵa bolady.
Bul týraly QR Sý resýrstary jáne ırrıgatsııa birinshi vıtse-mınıstri Nurlan Aldamjarov Ortalyq kommýnıkatsııalar qyzmetinde ótken baspasóz konferentsııasynda málim etti.
— Qalalyq jaǵdaıda gazondardy sýarý úshin tehnıkalyq sýdy, ıaǵnı tazartylǵan aǵyn sýlardy qoldanýǵa bolady. Sondyqtan men qalalardaǵy parkter men jasyl aımaqtardaǵy gazondar men aǵashtardy sýarý úshin tazartylǵan aǵyn sýlardy paıdalanýdy usynamyn. Bul sý tazartý qondyrǵylarynda óńdelip, tehnıkalyq maqsatta qaıta paıdalanýǵa jaramdy, — dedi vıtse-mınıstr jýrnalıster suraǵyna jaýap bere otyryp.
Sondaı-aq baspasóz konferentsııasy barysynda Nurlan Aldamjarov 2025 jylǵy vegetatsııalyq kezeńniń aıaqtalýy týraly da málimet berdi.
— Egistikke sý berý maýsymy bıyl ortasha kópjyldyq merzimderden 20 kúnge erte bastaldy. Buǵan kóktemde tirkelgen anomaldy joǵary aýa temperatýrasy sebep boldy. Al vegetatsııa aldyndaǵy kezeńde topyraqtyń jetkilikti ylǵaldanbaýy, ásirese ońtústik óńirlerdegi sý sharýashylyǵy jaǵdaıyna keri áser etti, — dedi ol.
Buǵan deıin áleýmettik jeliler men buqaralyq aqparat quraldarynda Almaty qalasy ákimdiginiń baspasóz qyzmetine silteme jasaı otyryp, ákim Darhan Satybaldynyń gazondar men sýarmaly ósimdikterden bas tartýdy usynǵany týraly aqparat taraǵan bolatyn. Onyń aıtýynsha, mundaı ósimdikterge kútim jasaý qıyn ári olar jıi sýarýdy qajet etedi.
Osydan buryn Túrkistan oblysynda aǵyn sý tapshylyǵyn eńserý sharalary kúsheıtilgenin jazǵanbyz.