Aldaǵy jyly jolserikter attestatsııalaýdan ótedi
NUR-SULTAN. QazAqparat – 2020 jyly temirjol salasyndaǵy qyzmetkerlerdi attestatsııalaý josparlanyp otyr. Bul týraly «Jolaýshylar tasymaly» AQ bas dırektorynyń korporatıvtiń máseleler jónindegi orynbasary Asylhan Qaldykozov málim etti, dep habarlaıdy QazAqparat tilshisi.
«Bizde 6 myńǵa jýyq jolserik, 1 myńǵa tarta bılet kassıri qyzmet etýde. Jyldyń basynan beri 385 adam tártiptik jazaǵa tartyldy. Sonyń ishinde 170 adammen eńbek kelisimsharty buzyldy. Bul turǵyda bıletsiz jolaýshy jáne rásimdelmegen júk tasymaldaǵany úshin qyzmetkerlerge qatysty shara qoldanyldy», - dedi ol Ortalyq kommýnıkatsııalar qyzmetindegi baspasóz máslıhatynda.
Onyń sózine qaraǵanda, 2020 jyly temirjol qyzmetkerlerin attestatsııalaý men olardyń biliktiligin jetildirý boıynsha qosymsha jumystar josparlanyp otyr.
«Birinshi kezekte biz ózimizdiń qyzmetkerlermen jumys isteýimiz kerek jáne qyzmetine salǵyrt qaraıtyndardy bul salaǵa jolatpaý kerek. ıAǵnı, temir salasyna teris kózqaras týdyratyn adamdar jolaýshylarǵa qyzmet kórsetpeý tıis», - dedi Asylhan Qaldykozov.
Eske sala keteıik, QR Prezıdenti Qasym-Jomart Toqaev Úkimetke jazda poıyz bıletiniń tapshylyǵyn joıýdy tapsyrdy.
«Úkimetke jaz mezgilinde poıyz bıletteriniń tapshylyǵyn qoldan jasaýdy toqtatý týraly tapsyrma berdim. Bul jaǵdaı azamattarymyzǵa qolaısyzdyq týǵyzyp, elimizdegi ishki týrızmniń damýyna kedergi keltirip otyr», dep jazdy Memleket basshysy Twitter-degi paraqshasynda.
