Aldaǵy jyly «Google aýdarmashy» júıesinde qazaq tili paıda bolady

ASTANA. 24 jeltoqsan. QazAqparat - Aldaǵy jyly «Google aýdarmashy» júıesinde qazaqsha-aǵylshynsha nemese aǵylshynsha-qazaqsha aýdarmasy júzege asyrylady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte «Wikibilim» qoǵamdyq qorynyń basshysy Raýan Kenjehanuly málim etti.

«Bul «Wikibilim» qoǵamdyq qorynyń iske asyryp jatqan qazaq tildi ınternetti damytý baǵdarlamasy aıasyndaǵy jobalardyń biri. Ózderińiz jıi qoldanatyn «Google» júıesinde aýdarma qyzmeti bar. Qazir osy aýdarma qyzmetinde 80 til jumys isteıdi, ıaǵnı bunyń ishinde jekelegen sózderdi, sóılemderdi, úlken mátinderdi, veb-saıttardy erkin aýdaratyn tegin jumys isteıtin úlken ǵalamdyq júıe bar. Búginde aýdarmada keńinen qoldanylatyn negizgi júıelerdiń biri osy. Sondyqtan bul aýdarma qyzmetine qazaq tilin qosý bastamasyn osydan 1,5 jyl buryn qolǵa alǵan kezde, «jobany iske asyrý úshin qandaı sharalar jasalýy kerek?» degen suraqpen «Google» kompanııasymen baılanystyq»,-dedi ol.

Raýan Kenjehanulynyń sózine qaraǵanda, biraz ýaqyt buryn «Google» kompanııasy qazaqsha aýdarma qyzmeti sapasyn tekserý kezeńiniń bastalǵanyn jarııa etti. «Osy turǵyda qazaqsha jáne aǵylshyn tilin jetik biletin kópshilik júıege emin-erkin kirip, aýdarmalarǵa «óte jaqsy» nemese «nashar» degen aralyqta baǵalaýy tıis. Neǵurlym kóp sóılemge baǵa bersek, soǵurlym tezirek qazaq tili «Google aýdarmashy» qyzmetinde paıda bolady jáne aýdarmanyń sapasy da joǵary deńgeıde qalyptasady»,-dep naqtylap ótti ol.

Osy jumysty jyldamdatý úshin aýdarmaǵa kásibı aýdarmashylar tartylatyn kórinedi. Aldaǵy úsh aı boıy onshaqty kásibı aýdarmashy kúndelikti osy jumyspen aınalysyp, 300 myńǵa tarta qazaqsha-aǵylshynsha sóılemderdiń aýdarmalaryn baǵalap shyǵady.