Aldaǵy jyly dıqandardyń ammofosqa degen qajettiligin tolyq qanaǵattandyramyz - Óskenbaev

ASTANA. QazAqparat - Respýblıka kúni qarsańynda Indýstrııa jáne ınfraqurylymdyq damý mınıstri Qaıyrbek Óskenbaev «Qazfosfat» JShS-niń Taraz fılıalyndaǵy mıneraldy tyńaıtqyshtardy óndiretin jańa tsehtyń ashylý saltanatyna qatysty, dep habarlaıdy QazAqparat mınıstrliktiń resmı saıtyna silteme jasap.

Saıttaǵy málimetterge qaraǵanda, jobanyń quny 72 mlrd teńgeni quraıdy, tseh jylyna 1 mln tonnaǵa deıin kólemde daıyn ónim, ıaǵnı mıneraldy tyńaıtqyshtardy óndirýge qaýqarly.

IIDM basshysynyń aıtýynsha, «Qazfosfat» hımııa salasy naryǵyndaǵy iri kásiporyn bolyp tabylady. Agrohımııa sektorynda ónimniń jartysynan kóbin atalǵan kásiporyn óndiredi.

«Búgin eń kóp suranysqa ıe tyńaıtqyshtardyń biri – ammofos óndirisiniń ekinshi jelisin iske qostyq. Osy jobany tabysty iske asyrýdyń nátıjesinde aldaǵy jyly qazaqstandyq agrarıılerdiń ammofosqa degen qajettiligin tolyq qanaǵattandyrý josparlanyp otyr. Bul óz kezeginde eldiń azyq-túlik qaýipsizdigine syrtqy faktorlardyń áserin azaıtýǵa múmkindik beredi. Aýyl sharýashylyǵyn turaqty júrgizý jáne azyq-túlik qaýipsizdigin qamtamasyz etý maqsatynda agrohımııalyq sektordy damytýǵa erekshe nazar aýdaryldy», – dep atap ótti Qaıyrbek Óskenbaev.

Aıta keterligi, Memleket basshysy ishki naryqty otandyq tyńaıtqyshtarmen 100% qamtamasyz etý mindetin qoıǵan bolatyn. Osy rette «Qazfosfat» JShS damý strategııasy hımııa salasyn damytý vektoryna tolyq sáıkes keledi.

Óz kezeginde «Qazfosfat» JShS Basqarma Tóraǵasy N.Nurlanov kásiporynnyń qazirgi jaǵdaıy týraly aıtyp berdi.

«Qazfosfat» fosforly mıneraldy tyńaıtqyshtardyń iri otandyq óndirýshisi bolyp tabylady. Tyńaıtqyshtardy qoldaný aýyl sharýashylyǵy daqyldarynyń ónimdiligi men sapasyn arttyryp, sondaı-aq topyraq qunarlylyǵyn saqtaý jáne arttyrý faktorlarynyń biri», – dedi N.Nurlanov.

Jalpy «Qazfosfat» – fosfattardy óndirýden bastap olardy túpkilikti ónimge jetkizýge deıin tolyq jelini qamtıtyn Qazaqstan aýmaǵyndaǵy biregeı kompanııa. Zaýyttyń negizgi óndiristik qýaty Jambyl oblysynda shoǵyrlanǵan. Quryltaıshysy - «KAZ Chemicals» JShS. Búgingi tańda kásiporyn mıneraldy tyńaıtqyshtar, sary fosfor, natrıı trıpolıfosfaty, ammofos, jemshóp trıkaltsıı fosfaty, termııalyq ortofosfor qyshqyly, trıkaltsıı fosfaty jáne basqa da ónimderdiń keń assortımentin usynady.

«Qazfosfat» JShS quramyna «Qarataý» jáne «Sholaqtaý» taý-ken óńdeý keshenderi, Novodjambýl fosfor zaýyty, mıneraldy tyńaıtqyshtar zaýyty, Stepnogorsk hımııa zaýyty, sondaı-aq Shymkent sıntetıkalyq jýǵysh zattar zaýyty sııaqty fılıaldar kiredi. Kompanııa ónimderiniń 91 paıyzy Eýropaǵa, TMD, Úndistan jáne basqa elderge eksporttalady.