Aldaǵy jyly Almaty men Túrkistanda jańa tennıs ortalyqtary ashylady
NUR-SULTAN. QazAqparat – Aldaǵy jyly Almaty men Túrkistan qalalarynda jańa tennıs ortalyqtary ashylady. Bul týraly Qazaqstan tennıs federatsııasynyń prezıdenti Bolat Ótemuratov jyl qorytyndysyna arnalǵan jıynda aıtty, dep habarlaıdy QazAqparat tilshisi.
Qazaqstan tennıs federatsııasy málim etkendeı, Bolat Ótemuratov ótip bara jatqan jyldyń qazaqstandyq tennıs úshin óte tabysty bolǵanyn, 2022 jyly óńirlerlerge erekshe kóńil bóletinin jetkizdi.
Onyń sózine qaraǵanda, sonymen qatar Taraz, Oral, Shymkent, Almaty jáne Nur-Sultan qalalarynda jańa tennıs ortalyqtaryn salý josparlanyp otyr.
«Ár óńir aldaǵy jyly óziniń jetekshi oıynshylaryna keminde 8 ulttyq, 5-6 halyqaralyq týrnırlerge qatysýyn qamtamasyz etýi kerek. Óńirde ár jas ereksheligine qaraı keminde eki jarys uıymdastyrylýy tıis. Búkil jerde sapaly «sporttyq pıramıda» qurý úshin 5-7 jasar balalardy irikteý qajet. Barlyq oblysta jumys istep turǵan tennıs ortalyqtarynyń ınfraqurylymyna qatysty tennıs jabynyn jóndeý, jaryqtandyrý sekildi máseleler bir jyl ishinde tolyqtaı sheshilgeni jón. Buǵan federatsııa qajetti qoldaý kórsetetin bolady», dedi B.Ótemuratov.
Eske sala keteıik, budan buryn tennısten Devıs kýbogynda Qazaqstan quramasynyń Norvegııamen kezdesetinin jazǵan bolatynbyz.
