Aldaǵy jyldyń qańtarynan bastap temirjol tasymalynda bıletterdiń quny 10 paıyzǵa qymbattaıdy
ASTANA. Qarashanyń 25-i. QazAqparat /Gúlmıra Álıakparova/ - 2010 jylǵy qańtardyń 1-inen bastap jolaýshylar tasymaldaýshy temirjol kólikterinde bıletterdiń baǵasy 10 paıyzǵa qymbattaıtyn bolady.
Bul týraly búgin ótken baspasóz máslıhatynda «Jolaýshylar tasymaly» AQ basqarma tóraǵasy Baıdaly Dárimbetov málim etti, dep habarlaıdy QazAqparat.
B.Dárimbetovtyń atap kórsetkenindeı, respýblıkada temirjol kólikterine bılet baǵalary 2005 jyly - 20, 2006 jyly - 15 jáne 2007 jyly - 15 paıyzǵa kóterilip, sońǵy úsh jyldan beri turaqty bolyp keldi.
Onyń aıtýynsha, eger basqa taýarlar men qyzmetterdiń qymbattap otyrǵan qazirgi kezeńinde temirjol bıletteriniń qunyn arttyrmasa, shyǵyndardy respýblıkalyq jáne jergilikti bıýdjettiń ıyǵyna artýǵa týra keletin bolady.
Sondaı-aq Basqarma tóraǵasy dáıekti sebepterdiń biri retinde TMD elderindegi kýpe jáne platskartty vagondarda 500 shaqyrymǵa shaqqandaǵy bılettiń baǵalaryn salystyrmaly túrde usyndy. Máselen, Qazaqstanda halyqaralyq qatynastaǵy platskartty vagondaǵy bılet quny - 2 666 teńge bolsa, ol Reseıde - 4 750 teńge, Qazaqstanda kýpe - 4 297, al Reseıde - 8 803 teńge turady. Sonymen qatar, el ishindegi qatynastardaǵy platskartty vagondarda ol - 1058 teńge, Reseıde - 3338 teńge, respýblıkada kýpe - 1702 teńge bolsa, Reseıde - 7162 teńge turady.
«Osy sebepti biz 2010 jylǵy qańtardyń 1-inen bastap bılet baǵasyn 10 paıyzǵa arttyrý máselesin kóterip otyrmyz. Bul másele búginde QR Tabıǵı monopolııalardy retteý agenttiginde qaralý ústinde», - dedi ol.
