Aldaǵy jyldyń 15 qańtaryna belgilengen QR Parlamenti Májilisi men máslıhat depýtattarynyń saılaýynda saılaýshylar úsh túrli bıýllıýten alatyn boldy - OSK
ASTANA. 21 qarasha. QazAqparat - Kelesi jyldyń 15 qańtaryna belgilengen QR Parlamenti Májilisi men máslıhat depýtattarynyń saılaýynda saılaýshylar úsh túrli bıýllıýten alatyn boldy.
Bul týraly búgin Ortalyq saılaý komıssııasynyń kezekti otyrysynda komıssııa tóraǵasy Qýandyq Turǵanqulov málim etti.
Onyń aıtýynsha, bıýllıýtenderdiń bireýi Parlament Májilisi depýtattarynyń saılaýynda daýys berýge arnalǵan. Ekinshi bıýllıýten oblystyq máslıhat depýtattyǵyna kandıdat úshin daýys berýge, al úshinshi bıýllıýten aýdandyq nemese qalalyq máslıhattyń depýtattyǵyna kandıdat úshin daýys berýge arnalǵan. Al Astana men Almaty qalalarynyń turǵyndary eki bıýllıýten alady. Óıtkeni bul qalalarda aýdandyq máslıhattar joq. Sondyqtan munda saılaýshylar daýystaryn saıası partııaǵa nemese qalalyq máslıhattyń depýtatyn saılaý úshin berýge tıis bolady. «Qazirgi ýaqytta OSK barlyq qajetti daıyndyq sharalaryn ótkizýde. Sondaı-aq aldaǵy saılaýǵa tıimdi aqparattyq qoldaý kórsetýge, saılaýdy uıymdastyrýshylardy oqytýǵa kúsh jumyldyryp otyr. Saılaýdy uıymdastyrýshylar úshin respýblıkalyq semınar keńesinen basqa óńirlik jıyndar da ótkiziletin bolady», - dedi OSK tóraǵasy.
