Aldaǵy jyldary telearnalarǵa qaraǵanda ınternettegi jarnama úlken suranysqa ıe bolady - «Qazaqtelekom»
ASTANA. QazAqparat - Aldaǵy 4 jylda telearnalarǵa qaraǵanda ınternettegi jarnama úlken suranysqa ıe bolady. Bul týraly búgin Astanadaǵy Táýelsizdik saraıynda BUU-nyń «Elektrondyq úkimet» jahandyq forýmynda «Qazaqtelekom» AQ basqarma tóraǵasy Qýanyshbek Esekeev málim etti.
Onyń aıtýynsha, eger osy kúnge deıin adamdar teledıdar aldynda kóp ýaqytyn ótkizip kelse, endi adamdardyń ınternet jelisin paıdalaný ýaqyty artyp keledi.
«Barlyǵy ózgerip keledi. Meniń oıymsha, aldaǵy 3-4 jylda jarnama naryǵy ózgeriske ushyraıdy. Telearna arqyly klıentterdi tartýǵa eleýli shyǵystar jumsaýdyń máni bolmaıdy jáne endi ınternet arqyly klıentterdi qyzyqtyrýǵa shyǵystar arta túsedi»,-dedi «Qazaqtelekom» basshysy.
Q. Esekeevtiń atap ótýinshe, búginde uıaly baılanystyń quny tómendep keledi jáne talshyqty-optıkalyq ınfraqurylymdy paıdalaný qymbattaı tústi.
«Meniń oıymsha, sondyqtan da operatorlar bir mezgilde bir ınfraqurylymdy paıdalaný týraly sheshimge kelip, marketıng tartysy júretin bolady»,-dedi ol.
