Aldaǵy jyldary Qazaqstan eńbek ónimdiliginde EYDU elderiniń kórsetkishine jaqyndamaq
ASTANA. QazAqparat - 2025 jylǵa qaraı Qazaqstan eńbek ónimdiligi boıynsha EYDU elderiniń kórsetkishine jaqyndamaq. Bul týraly búgin Astanada ónerkásipterdegi básekege qabilettilikti arttyrýǵa arnalǵan besinshi halyqaralyq ǵylymı-tájirıbelik konferentsııada QR Investıtsııalar jáne damý birinshi vıtse-mınıstri Albert Raý málim etti.
«Biz Qazaqstannyń ınvestıtsııalyq ahýalyna eki zertteý júrgizdik. Atap aıtqanda, osy taldaý turǵysynda biz Ekonomıkalyq yntymaqtastyq jáne damý uıymy maqsattaryn kórip otyrmyz, sondaı-aq ónerkásip baǵytynda osy uıymdaǵy eńbek ónimdiligine baǵdarlanýdamyz. 2015 jyly EYDU elderinen ortasha eńbek ónimdiligi boıynsha 60 paıyzǵa qalys kelemiz. 2020 jylǵa qaraı bul kórsetkishti 50 paıyzǵa deıin, al 2025 jylǵa qaraı 30 paıyzǵa deıin qysqartpaqpyz»,-dedi A. Raý.
Osy rette ol bul baǵytta jetistikterge qol jetkizý úshin IID memlekettik baǵdarlamasynyń ekinshi besjyldyǵy aıtarlyqtaı yqpal etetinin qadap aıtty.
«Integratsııalyq jaǵdaıda jáne DSU aıasynda kásiporyndar úshin ónimdilikti arttyrý basymdyqty maqsatqa aınalyp otyr. Birinshi besjyldyqta qarqyndy ındýstrıaldy damý úshin bazalyq jaǵdaılar jasaldy. Osy rette zańnamalyq baza, ınfraqurylym, qajetti tetikter júzege asyryldy. Sonymen qatar birinshi bes jyldyqta jańa jobalar barsha ónerkásiptik óndiristiń 10 paıyzyn berdi. Sol kezeńde baǵdarlamaǵa engen salalardyń keń shoǵyry qamtylyp, onyń aıasynda eldiń barlyq ónerkásibi eskerildi. 2016 jylǵy birinshi toqsannyń qorytyndysy boıynsha barsha ónimniń besten bir bóligi jańa jobalarmen óndirilýde», - dedi ol.
