Aldaǵy jyldary bıýdjet tapshylyǵy qaı deńgeıde bolady

NUR-SULTAN. QazAqparat – 2022 jyly bıýdjet tapshylyǵy jalpy ishki ónimge qatysty 3,3% deńgeıinde boljanyp otyr. Bul týraly Parlament Májilisiniń jalpy otyrysynda QR Ulttyq ekonomıka mınıstri Áset Erǵalıev málim etti, dep habarlady QazAqparat tilshisi.

«Ulttyq bank jyldyq ınflıatsııanyń nysanaly dálizi 2022 jyly 4-6 %, 2023-2024 jyldary – 4-5% aralyǵynda, 2025-2026 jyldary – 3-4% sheginde saqtalǵan. Osy makroekonomıkalyq kórsetkishterdi eskere otyryp, respýblıkalyq bıýdjettiń kiristeri transfertterdi esepke almaǵanda 2022 jyly boljamdar boıynsha 9,2 trıllıon teńgeni,

2023 jyly - 9,7 trıllıon teńgeni, 2024 jyly - 10,4 trıllıon teńgeni quraıdy», - dedi Á. Erǵalıev.

Onyń aıtýynsha, kepildendirilgen transfertti 2022 jyly - 2,4 trıllıon teńge, 2023 jyly - 2,2 trıllıon teńge jáne 2024 jyly - 2 trıllıon teńge mólsherinde aıqyndaý usynylyp otyr.

«Budan basqa, Ulttyq qordan 2022 jyly 550 mıllıard teńge mólsherinde, onyń odan ári qysqarýymen 2023-2024 jyldary jyl saıyn 400 mıllıard teńgeden nysanaly transfert tartý usynylady. 2022 jyly bıýdjet tapshylyǵy jalpy ishki ónimge qatysty 3,3% deńgeıinde, keıinnen 2024 jyly jalpy ishki ónimge qatysty 2,5% deıin tómendeýmen boljanyp otyr. 2022 jyly munaı emes tapshylyq ishki ónimge qatysty 8,1% qurap, keıinnen 2024 jyly jalpy ishki ónimge qatysty 6,3% deıin tómendeıdi», - dedi mınıstr.

Respýblıkalyq bıýdjettiń shyǵystary 2022 jyly 15,9 trıllıon teńge, 2023 jyly – 15,6 trıllıon teńge jáne 2024 jyly – 16 trıllıon teńge kóleminde boljanyp otyr.