Aldaǵy jyldan «Bolashaq» baǵdarlamasynda aýyl muǵalimderine kvota eskeriledi

ASTANA. QazAqparat - 2017 jyldan bastap aýyl mektepteriniń muǵalimderi «Bolashaq» arqyly oqytylmaq. Búgin QR Memlekettik hatshysy Gúlshara Ábdiqalyqovanyń qatysýymen Shetelde kadrlar daıarlaý jónindegi respýblıkalyq komıssııanyń kezekti otyrysynan keıin «Halyqaralyq baǵdarlamalar ortalyǵy» AQ prezıdenti Ǵanı Nyǵymetov osylaı málim etti.

«Búgingi komıssııanyń otyrysynda buǵan deıingi berilgen tapsyrmalardyń oryndalýy qaraldy. Onyń ishinde oqýǵa sheteldiń bedeldi joǵary oqý oryndaryna magıstratýra men doktorantýraǵa «óz betinshe túskender» sanaty boıynsha úmitkerlerge 2 jyldyq eńbek ótili bolýy jónindegi talapty alyp tastaý týraly sheshim bolǵan edi. Endi sol sheshimdi iske asyryp, erejege engizdik. Jaqyn arada Úkimettiń qaýlysy qabyldanady»,-dedi Ǵ. Nyǵymetov.

«Bolashaq» arqyly elimizde birqatar mańyzdy salalarǵa bilikti kadrlar daıyndaý iske asyrylyp jatqandyǵyna toqtalǵan ol, osy rette tehnıkalyq mamandyqtarǵa erekshe nazar aýdarylyp otyrǵandyǵyn atap ótti.

«Sonymen birge birqatar jańa tapsyrmalar berildi. Sonyń ishinde aýyldyq muǵalimderge jeke kvota jasaý eskerilip otyr. Osy másele pysyqtalyp, kelesi jyldan bastap aýyl muǵalimderine «Bolashaqpen» jeńildikpen túsýge múmkinshilik bolady»,-dedi ortalyq prezıdenti.