Aldaǵy jeti jylda transshekaralyq ózenderdiń aǵyny 10-15% qysqarýy múmkin

ASTANA. QazAqparat – 2030 jylǵa qaraı transshekaralyq ózenderdiń aǵyny shamamen 10-15%-ǵa qysqarýy múmkin. Bul týraly Ashyq NQA portalynda jarııalanǵan QR Sý kodeksi jobasynyń tujyrymdamasynda kórsetilgen, dep habarlaıdy QazAqparat tilshisi.

«Aǵynsyz basseınder jáne kól betinen býlanýdyń joǵary deńgeıi olardy ustap turýǵa arnalǵan sýdyń edáýir shyǵynyna alyp keledi. Qazir tabıǵı-sharýashylyq júıelerdiń sý resýrstaryna ekologııalyq suranysy - shamamen 64 mlrd tekshe metr. Sonymen qosa, kórshiles elderdiń ekonomıkalyq jáne áleýmettik damýynyń jedeldeýi saldarynan jyldam qysqaryp kele jatqan jerústi sýynyń 44%-yn quraıtyn Qytaıdan, Reseıden, Ózbekstannan jáne Qyrǵyzstannan keletin transshekaralyq ózenderge táýeldilik bar. Boljamǵa sáıkes, transshekaralyq ózenderdiń aǵyny 2030 jylǵa qaraı shamamen 10-15%-ǵa qysqarýy múmkin», - delingen qujatta.

Mınıstrlik málimetinshe, bul baǵytta tıisti sharalar qoldanylmasa, onda 2030 jylǵa qaraı 23 mlrd tekshe metr kóleminde sý tapshylyǵy bolady.

«Mundaı sý tapshylyǵy kól jáne ózen ekojúıesiniń jáne balyq aýlaý kásipshiliginiń, ásirese Balqash kólinde, Іle ózeniniń atyraýynda, ortalyq Qazaqstannyń, Soltústik Araldyń jáne taǵy da basqa sý aıdyndary kóleminiń tómendeýine alyp kelýi múmkin», - dep kórsetilgen tujyrymdamada.

Mınıstrlik máseleniń sheshimi retinde QR Sý kodeksin qabyldaýdy usynady.

Ol arqyly resýrstardy paıdalanýdy retteý máselesin retteý jumystary qolǵa alynbaq.

Sonymen qosa, sýdy únemdeý sharalary qabyldanyp, jańa tehnologııalardy engizý múmkindikteri qarastyrylady.