Aldaǵy jeksenbide Astanada 40 baǵdar boıynsha avtobýstar toqtaıdy
ASTANA. QazAqparat - 4 qyrkúıekte Astanadaǵy sporttyq sharalarǵa baılanysty birqatar kóshelerde kólik qozǵalysy shekteledi. Bul týraly búgin baspasóz máslıhatynda qalalyq ІІD Ákimshilik polıtsııa basqarmasy basshysynyń orynbasary Eljan Shúpekov málim etti.
«Marafon ótetin kúni osy sportshylar júgiretin baǵdarda qozǵalysty tolyqtaı shekteımiz. Osy baǵdarlardy BAQ-tan, ınternet-portaldardan kórýge bolady. Bul baǵdarlarda kóldeneń qozǵalystarǵa da shekteý qoıamyz. Ózderińiz bilesizder, marafon álemdik aýqymda ótkeli jatyr, ıaǵnı Astana úshin mańyzdy shara bolyp tabylady. Qosshyǵa qaraı jol da marafonǵa baılanysty jabylady. Biz saǵat 07:30-dan 14:00-ge deıin joldardy jabatyn bolamyz. Degenmen de marafonǵa qatysýshylar erterek júgirip ótken kóshelerde qozǵalys ýaqytynan buryn ashylýy múmkin»,-E. Shúpekov.
Sonymen qatar ol 4 qyrkúıekte Qazaqstan men Polsha komandalary arasynda fýtbol matchynyń ótkizilýine baılanysty Turan dańǵylynyń ýchaskeleri boıynsha, Qabanbaı batyr dańǵylynyń Kereı jáne Jánibek handar kóshesinen bastap Hýseın ben Talal kóshesine deıingi aralyqta qozǵalys shekteletinin atap ótti.
Osy rette qoǵamdyq kólikterdiń qozǵalysyna basymdyq beriledi. Sondyqtan da jankúıerlerge avtobýspen fýtbolǵa kelýi usynylyp otyr. Arnaıy bes otyrǵyzý alańdary uıymdastyrylady, ıaǵnı «Qazaqstan» sport kesheni, «Haziret Sultan» men «Nur Astana» meshitteri mańyndaǵy avtoturaqta, elordalyq tsırk mańyndaǵy jáne Q. Muńaıtpasov atyndaǵy stadıon janyndaǵy avtoturaqta alańdar bolady.
Belgili bolǵandaı, Astanada 4 qyrkúıekte «Astana marafonyn» ótkizýge baılanysty kólik qozǵalysy shektelýine oraı, qalalyq qoǵamdyq kólik baǵdarlarynyń qozǵalys syzbasy ýaqytsha ózgeredi. Atap aıtqanda, sol kúni 14:00-ge deıin qaladaǵy qyryq avtobýs baǵdary toqtatylady, al 19 baǵdarda qozǵalys syzbasy ózgeredi.
