Aldaǵy úsh jylda salynýǵa tıis 155 mektepke jer ýchaskesi bólinbegen

NUR-SULTAN. QazAqparat – 2025 jyldyń sońyna deıin salynýy kerek 155 mektepke jer ýchaskesi bólinbegen. Bul týraly QR Oqý-aǵartý vıtse-mınıstri Ǵanı Beısembaev aıtty, dep habarlaıdy QazAqparat tilshisi.

«Ákimdikter áli kúnge deıin jańa mektep salý úshin jer ýchaskelerin bólý máselesin tolyq sheshken joq. Máselen, 2025 jyldyń sońyna deıin nysandardyń 26 paıyzy nemese 155 mekteptiń qurylysy jer ýchaskesimen qamtamasyz etilmegen. Úkimet tıisti tapsyrmany ótken jyldyń qarashasynda bergen bolatyn. Bul máselede apatty jáne úsh aýysymdy mektepterdegi oryn tapshylyǵyn joıý máselesin sheshýge asa múddeli ákimdikterdiń jaıbaraqattyǵy túsiniksiz. Shymkent qalasynda, Almaty, Atyraý, Batys Qazaqstan jáne Túrkistan oblystarynda jer ýchaskeleriniń bolmaýyna qatysty kúrdeli jaǵdaı oryn alyp otyr», - dedi ol mınıstrliktiń apparat jınalysynda.

Osy rette ol búkil ákimdikter mektep qurylysyna kerek jer ýchaskelerin bólý máselesin qysqa merzimde sheshýi qajettigin basa aıtty.

«Jergilikti atqarýshy organdarǵa júrgizilip jatqan jumysty júıelendirý maqsatynda bıyl 225 mektepti paıdalanýǵa berý boıynsha bekitilgen jospardyń iske asýyn qamtamasyz etýdi, Memleket basshysynyń tapsyrmasyn oryndaý jóninde ózge de sharalardy tııanaqty júzege asyrýdy usynamyn», - dedi Ǵanı Beısembaev.