Aldaǵy úsh jylda Qazaqstan ishki naryqty qus etimen tolyqtaı qamtamasyz etedi

NUR-SULTAN. QazAqparat – 2025 jylǵa qaraı Qazaqstan ishki naryqty qus etimen tolyqtaı qamatamasyz etedi. Bul týraly ІH halyqaralyq qus ósirýshiler forýmynda QR Aýyl sharýashylyǵy birinshi vıtse-mınıstri Aıdarbek Saparov aıtty, dep habarlaıdy QazAqparat tilshisi.

«2025 jylǵa qaraı qus eti boıynsha ımportty tolyqtaı otandyq ónimmen almastyrý josparlanǵan. Bul turǵyda jańa qus fabrıkalary salynyp, qazir qoldanysta turǵandary jańǵyrtýdan ótedi», - dedi A. Saparov.

Onyń aıtýynsha, 2021 jyldyń qorytyndysy boıynsha 8 qus fabrıkasy paıdalanýǵa berilgen. Jobalardyń jalpy quny 40 mlrd teńgeni qurady. Al jańadan qurylǵan jumys oryndary 500-ge jýyqtaǵan.

Óz kezeginde Qazaqstan qus ósirýshileri odaǵynyń prezıdenti Rýslan Sháripov elimizdiń birneshe óńirinde fabrıkalar salynyp jatqanyn aıtty.

«Meniń oıymsha, aldaǵy eki-úsh jylda qus etimen ishki naryqty tolyqtaı qamtamasyz etemiz. Sonymen qatar, úırek pen qaz ósiretin sharýashylyqtar da elimizde birtindep damyp kele jatyr», - dedi R. Sháripov.

Bıyl Qazaqstanda qus ósirý salasynda oń kórsetkishter baıqalyp otyr.

Buǵan deıin habarlanǵandaı, qus jeminiń qymbattaýyna baılanysty qus ósirýshiler qıyndyqqa tap bolǵan.

«Qus jeminiń bir tonnasy 180-190 myń teńgege jetti. Qus eti men jumyrtqanyń ózindik qunynyń 70 paıyzy jemniń baǵasyna qatysty bolady. Eger qus jemi arzan bolsa, onda bizdiń ónim de naryqqa tómen baǵamen shyǵady», - dedi R. Sháripov

Qazaqstannyń qus ósirýshileri osy salaǵa memlekettik qoldaý jasaýdy surap otyr.