Aldaǵy úsh jylda el aýmaǵynda 304 jabdyqtalǵan ájethana ornatylady
NUR-SULTAN. QazAqparat – 2019-2021 jyldary Qazaqstan aýmaǵynda 300-den asa jabdyqtalǵan ájethana ornatylady. Bul týraly «Qazavtojol» aktsıonerlik qoǵamy bıznesti damytý departamentiniń dırektory Rýstam Isaev QazAqparat tilshisine bergen suhbatynda málim etti.
«Bıyl respýblıka boıynsha 53 jabdyqtalǵan ájethana ornatý josparlanyp otyr. Al aldaǵy 3 jylda el aýmaǵynda 304 ájethana ornatylatyn bolady. Árıne suranys odan da kóp. Qazirgi el kóleminde dalalyq aımaqtar men jol boıynda 800-ge jýyq jabdyqtalmaǵan ájethana bar, ıaǵnı olarda eshqandaı jaǵdaı jasalmaǵan. Odan bólek, taǵy 800-ge jýyq jeke sektor aýmaǵyndaǵy ájethan bar. Ol jol boıynda ornalasqan janarmaı beketiniń, dámhanalar men demalys oryndarynyń ájethanalary. Jańa ájethanalardy ornatý boıynsha aldymen ınvestıtsııalyq baıqaý ótkizemiz, onyń jeńimpazy ájethanalardy ornatý boıynsha ǵana emes onyń qyzmeti men jumys isteý sapasyna jaýap beretin bolady», - dedi Rýstam Isaev.
Onyń aıtýynsha, jabdyqtalǵan ájethanalar respýblıkalyq mańyzy bar tas joldardyń boıy men týrıstik nysandardyń mańaıynda ornatylatyn bolady. Jáne olardyń báriniń baǵasy birkelki bolady.
«Jospar boıynsha respýblıkalyq mańyzy bar tas joldar boıynda ár 50 shaqyrym saıyn ájethana ornatýdy kózdep otyrmyz. Negizinen jabdyqtalǵan ájethanaǵa ońtústik óńirde, atap aıtqanda Túrkistan oblysynda suranys joǵary. Jalpy bul jobany biz ótken jyly qolǵa alǵan bolatynbyz. 2018 jyly el aýmaǵynda 12 jabdyqtalǵan «KazWay» pavılony ornatylyp, búginde olar jumys isteýde», - dedi ol.
QazAvtoJol ókiliniń málimdeýinshe aldaǵy ýaqytta ornatylatyn jabdyqtalǵan 1 ájethananyń quny 16-20 mln teńgeni quraıtyn bolady.
«Buǵan deıin ornatylǵan «KazWay» pavılonynyń berýiniń quny 23 mln teńge turatyn. Endigi turǵyzylatyn bir ájethananyń quny 16 men 20 mln teńgeniń aralyǵyn quraıtyn bolady. Sebebi, keıingilerinde saýda alańy bolmaıdy. Degenmen ınsvestorlar qosymsha tabys tabý úshin saýda alańyn uıymdastyratyn bolamyz degen usynys bildirdi», - dep túsindirdi departament basshysy.
