Aldaǵy úsh jylda bıýdjet tapshylyǵy 2,2 paıyzdan 1,7 paıyzǵa deıin tómendeıdi - B. Sultanov

ASTANA. QazAqparat - Aldaǵy úsh jylda respýblıkalyq bıýdjet tapshylyǵy ishki jalpy ónimge 2,2 paıyzdan 1,7 paıyzǵa deıin tómendeıdi. Bul týraly búgin Májiliste «2015-2017 jyldarǵa arnalǵan respýblıkalyq bıýdjet týraly» zań jobasynyń tanystyrylymy barysynda Qarjy mınıstri Baqyt Sultanov málim etti.

Qarjy mınıstriniń aıtýyna qaraǵanda, aldaǵy úsh jylǵa tapshylyq Jańa bıýdjet saıasaty tujyrymdamasymen bekitilgen shekteýler negizinde anyqtalǵan. Bul rette bıýdjet tapshylyǵy ishki jalpy ónimge 2015 jyly 2,2 paıyzdy nemese 997 mlrd. teńgeni qurasa, 2016 jyly -1 059 mlrd. teńgeni nemese 2,1 paıyz, al 2017 jyly - 973 mlrd. teńgeni nemese 1,7 paıyzdy quraıtyn bolady.

«Respýblıkalyq bıýdjet shyǵystary 2015 jylǵa 7 trln. 307 mlrd. teńge kóleminde aǵymdaǵy jylǵy deńgeıge qaraǵanda 2,6 paıyz ósimimen boljanady. Al 2016 jylǵa 7 797 mlrd. teńge aldyńǵy jyldyń deńgeıine qaraǵanda 6,7% ósimimen, 2017 jylǵa - 8 100 mlrd. teńge 3,9 % ósimimen josparlanady», - deıdi B. Sultanov.