Aldaǵy úsh jylda bilim men ǵylymǵa 5,1 trln teńge baǵyttalady

NUR-SULTAN. QazAqparat - Senatta qarjy jáne bıýdjet komıtetiniń keńeıtilgen otyrysy ótip, onda «QR Ulttyq qorynan 2021 – 2023 jyldarǵa arnalǵan kepildendirilgen transfert týraly» jáne «2021 – 2023 jyldarǵa arnalǵan respýblıkalyq bıýdjet týraly» eki zań jobasy talqylandy, dep habarlaıdy QazAqparat.

Senatorlardyń aıtýynsha, elimizdiń aldaǵy 3 jylǵa arnalǵan bıýdjeti memlekettiń barlyq áleýmettik mindettemeleri eskerilip jasalǵan. Ekonomıkadaǵy kúrdeli kezeńge qaramastan, elimizde qoljetimdi turǵyn úı, jol qurylysy, óńirlerdi damytý jónindegi baǵdarlamalardy iske asyrý jalǵasa beredi. Járdemaqylar men zeınetaqy tólenedi, kásipkerlikti qoldaýǵa da qarjy salynǵan. Pandemııamen kúresý jáne basqa da aýrýlardy emdeý úshin dárigerlik mekemelerdi dári-dármektermen qamtamasyz etý basym baǵyt bolyp qala beredi.

«Úsh jyldyq kezeńde bıýdjettiń negizgi shyǵystary áleýmettik salaǵa bólinetin bolady. Aqsha áleýmettik tólemderdi – zeınetaqy men járdemaqyny ındeksteýge, pedagogtar men dárigerlerdiń jalaqysyn arttyrýǵa, sondaı-aq memlekettik jarnalar Áleýmettik medıtsınalyq saqtandyrý qoryna jiberiletin bolady», - dedi Senat depýtaty Nurlan Qylyshbaev.

Sonymen qatar, bıýdjet jobasynda bilim jáne ǵylym júıesin damytýǵa 5,1 trln teńge qarastyrylǵan. Negizgi qarjy qosymsha tólemdermen birge muǵalimderdiń jalaqysyn kóterýge jumsalady. Sondaı-aq stıpendııalardy, bilim berý granttaryn da ulǵaıtý josparlanyp otyr. Respýblıkalyq bıýdjetke sýmen jabdyqtaý júıelerin salý men jańǵyrtý, óńirlerge gaz jetkizý, az qamtylǵan jáne kó balaly otbasylar men jastardy turǵyn úımen qamtamasyz etý jónindegi jobalar da engizildi.

Sondaı-aq, Ulttyq qordan respýblıkalyq bıýdjetke bólinetin kepildendirilgen transfert mólsheri belgilendi. Bul aqshany yntymaqty zeınetaqyny tóleýge, respýblıkalyq bıýdjetten memlekettik bazalyq zeınetaqy tólemderine jiberý usynylatyn bolady.