Aldaǵy úsh jylda 18 jyljymaly medıtsınalyq keshen satyp alynady
NUR-SULTAN. QazAqparat - QR Densaýlyq saqtaý mınıstrligi aldaǵy úsh jyldyń ishinde shalǵaı eldi mekenderdiń turǵyndaryna qyzmet kórsetetin 18 jyljymaly medıtsınalyq keshen satyp alýdy josparlap otyr. Bul jaıynda Májilis depýtattarynyń resmı saýalyna jaýap bergen QR Premer-Mınıstri Asqar Mamın atap ótken, dep habarlaıdy QazAqparat tilshisi.
Úkimet basshysynyń málimetinshe, shalǵaıdaǵy aýyldyq eldi mekenderde medıtsınalyq qyzmetterdiń qoljetimdiligin qamtamasyz etý maqsatynda 49 jyljymaly medıtsınalyq keshen jumys isteıdi. Atalǵan keshenderde hırýrg, akýsher-gınekolog, otolraıngolog, oftalmolog, stomatolog syndy beıindi mamandar turǵyndarǵa keńes berip, medıtsınalyq protsedýralardy, zerthanalyq zertteýlerdi júzege asyrady.
«Aıtalyq, Densaýlyq saqtaý mınıstrliginiń aqparatyna sáıkes 2018 jyly jyljymaly medıtsınalyq keshen qyzmetimen 1 763 aýyldyq eldi meken qamtylyp, 826 102 adam (jalpy aýyl halqynyń 11 paıyzy) tekserildi. Bul rette profılaktıkalyq tekserý barysynda 88 609 naýqas anyqtalyp, onyń 29 440-y (33,2 paıyzy) emdeldi. 2019 jyly keminde 865 myń adamdy qamtý josparlanyp otyr. Aldaǵy úsh jylda óńirlerdiń ótinimderi boıynsha Densaýlyq saqtaý mınıstrligi 18 jyljymaly medıtsınalyq keshen (Atyraý - 2, Aqtóbe - 3, Qostanaı - 1, Qyzylorda - 5, Túrkistan - 4, Pavlodar - 3) satyp alýdy josparlap otyr», - dedi Asqar Mamın.
