Aldaǵy úsh kúnde ystyqtyń beti qaıtyp, ótkinshi jańbyr jaýady
ASTANA. QazAqparat - Aldaǵy úsh táýlikte Qazaqstannyń soltústik bóliginde tsıklonnyń áserine baılanysty aýa raıy ózgeredi. Jańbyr jaýyp, jekelegen aýdandarda burshaq túsedi, temperatýra ádettegiden 1-3ºS tómen bolady.
Bul týraly «Qazgıdromet» habarlaıdy.
«Respýblıkamyzdyń ońtústik jáne ońtústik-shyǵys aýdandary, tsıklonmen baılanysty atmosferalyq fronttardyń áserinde bolady. Shyǵys jaqqa yǵysqan olar, keı jerlerge naızaǵaıly, ótkinshi jańbyr ákeledi, aptap ystyqtyń beti qaıtqanymen, temperatýra klımattyq normadan áli de joǵary bolady. Tek batysta ǵana aýa raıy jaýyn-shashynsyz jáne óte ystyq bolady. Termometrdiń kúndizgi kórsetkishi plıýs 30-38º bolady, keı jerlerde 41ºS-ǵa jetedi», delingen habarlamada.
