Aldaǵy úsh kúnde respýblıkanyń basym bóliginde jańbyr jaýady
ASTANA. QazAqparat - «Qazgıdromet» RMK 30 tamyz - 1 qyrkúıekke arnalǵan aýa raıy boljamyn jarııalady.
«Qazaqstan ústindegi troposferadaǵy aýa aǵynynyń jyldamdyǵy (5 km shamasyndaǵy bıiktikte) 60-80 km/saǵ jetip, bul atmosferalyq protsesterdiń tez aýysýyna aparyp soqtyrady. Taıaý aradaǵy táýlikterde sýyq front soltústiktiń, ortalyq jáne shyǵys oblystarynyń aýa raıyna áserin tıgizip, keı jerlerde jańbyr jaýyp, kún kúrkirep, ekpindi jel soǵady. Batys oblystardyń aýa raıyna antıtsıklon áser etip, keıinnen ol respýblıkanyń qalǵan aýmaǵyna aýysady. Al batys oblystarǵa 1 qyrkúıekte Reseıdiń Eýropalyq aýmaǵynan kezekti atmosferalyq front jyljyp kelip, sonyń saldarynan keı jerlerde jańbyr jaýyp, jel kúsheıedi. Qazaqstannyń kóp bóliginde aýa temperatýrasy normadan 2-4ºS joǵary, al soltústik oblystarda normaǵa jýyq bolady», - dep jazylǵan habarlamada.
