Aldaǵy úsh kúnde ońtústik pen batysta ótkinshi jaýyn jaýady
NUR-SULTAN. QazAqparat - Sınoptıkter 11-13 sáýirge arnalǵan aýa raıy boljamyn jarııalady, dep habarlaıdy QazAqparat Qazgıdrometke silteme jasap.
Respýblıkanyń ońtústik jáne ońtústik-shyǵysyndaǵy atmosferalyq fronttar keı jerlerde naızaǵaı jarqyldap, jańbyr jaýýyna sebep bolady.
Reseıdiń eýropalyq bóliginen batys oblystarǵa qaraı atmosferalyq fronttar jyljıdy, sonyń saldarynan 12 sáýir kúni keı jerlerde jańbyr kútiledi.
Al Qazaqstannyń qalǵan aımaqtarynda sońǵy birneshe kún boıy jaýyn-shashynsyz, jyly aýa raıy saqtalyp tur. Oǵan sebep bolǵan antıtsıklon áli de óz yqpalyn saqtaıdy. Aldaǵy úsh táýlikte aýa temperatýrasy ortasha kóp jyldyq mánnen 3...6°S joǵary bolady.
