Aldaǵy úsh kúnde Qazaqstannyń soltústigi men shyǵysynda úsik saqtalady
ASTANA. QazAqparat - Karsk teńizinen kóterilgen sýyq aýa massalary qyrkúıektiń alǵashqy kúnderi Qazaqstanǵa jetip, respýblıkanyń birshama oblystarynda aýa raıynyń kúrt tómendeýine sebep boldy. Bul kúnderi soltústik, ortalyq jáne shyǵys oblystarda túnde úsik boldy, dep habarlaıdy QazAqparat.
«Qazgıdromet» RMK bergen málimetterge qaraǵanda, sýyq ári aýqymdy antıtsıklon Qazaqstannyń basqa óńirlerine de taraǵandyqtan, sýyq aýa raıy saqtalady.
Respýblıka oblystarynyń kóp bóliginde aýa temperatýrasy klımattyq normadan 3-5°S tómen bolady, tek batysta ǵana normadan 2-4°S joǵary bolýy múmkin. Soltústik, ortalyq jáne shyǵys oblystarda túnde jáne tańerteń tuman túsip, kórý múmkindigi 500 metrden az bolýy yqtımal.
