Aldaǵy úsh kúnde Qazaqstanda aýa raıy jyly, burqasyndy jáne kóktaıǵaq bolýy boljanýda
ASTANA. QazAqparat - Atlantıkalyq tsıklon Ýral aýmaǵyna oıysty. Osyǵan baılanysty jyly atmosferalyq aǵyn qazirdiń ózinde Qazaqstannyń batys oblystaryn kesip ótip, soltústigine jetti. Sondyqtan da temperatýra kúndiz ǵana emes, túnde de jylynyp, keıbir jerlerde +3º-qa jetedi, bul normadan 5-10º joǵary.
24-26 jeltoqsan kúnderi tsıklon Batys Sibir aýmaǵy arqyly shyǵysqa aýysady, onyń atmosferalyq aǵyndary áýeli jyly, odan keıin salqyn bolyp, Qazaqstan arqyly ótedi, sonyń saldarynan japalaqtap qar jaýyp, burqasyndatady, kórinimniń nasharlaýy 200-500 metrge deıin jetedi, keı jerlerde jeldiń ekpini 15-25 m/s-deıin kúsheıip, kóktaıǵaq bolady. Bul týraly «Qazgıdromet» RMK 24-26 jeltoqsanǵa arnalǵan aýa raıy boljamynda habarlady.
Taıaýdaǵy táýlikterde aýa temperatýrasynyń normadan 5-10º joǵary bolýy saqtalyp, 26 jeltoqsanǵa qaraı tómendeıdi, degenmen de osy kezeńde burynǵysha klımattyq kórsetkishtiń joǵary bolýy kútiledi.
