Aldaǵy úsh kúnde elimizdiń soltústik jáne shyǵys bóliginde aıaz, boran jáne kóktaıǵaq bolady
ASTANA. QazAqparat – Aldaǵy úsh kúnde elimizde kún kúrt sýytyp, boran, kóktaıǵaq bolady, dep habarlaıdy QazAqparat «Qazgıdromet» RMQ silteme jasap.
«Boljam jasaǵanymyzdaı, atlantıkalyq tsıklon men jaýyn-shashynǵa, ásirese qar jaýýyna sebep bolatyn atmosferalyq aǵyndar birtindep shyǵysqa qaraı aýysyp jatyr. Sonyń saldarynan el aýmaǵynda aýa raıy qubylmaly bolady, Qazaqstannyń shyǵysynda – qalyń qar, ońtústiginde – jańbyr men qar, taýly aımaqtarda mol mólsherde jaýyn-shashyn túsedi», - delingen «Qazgıdromet» habarlamasynda.
Respýblıka aýmaǵynda boran, kóktaıǵaq, batysy men ońtústiginde tuman bolýy múmkin. Biraq sınoptıkterdiń boljamy boıynsha, 7 qańtarda eldiń batysynan sýyq arktıkalyq antıtsıklon jyljı bastaıdy da, birtindep jaýyn-shashyn toqtaıdy. Sodan keıin aýa temperatýrasy áýeli batysta, keıin eldiń basqa aımaqtarynda kúrt tómendeıdi.
Termometr baǵany eldiń batysy men ortalyǵynda mınýs 20-28 gradýsqa deıin tómendeıdi, soltústik-batys, soltústikte 25-33 gradýs, shyǵysta 5-13, ońtústikte 0-10 gradýsqa deıin aıaz bolady.
