Aldaǵy úsh kúnde elimizdiń basym bóliginde jaýyn jaýady
ASTANA. QazAqparat – Aldaǵy kúnderi Qazaqstan aýmaǵyna Atlantıkalyq tsıklon jáne onymen baılanysty frontaldy bólikter yqpal etedi.
Osyǵan baılanysty kúzgi qubylmaly aýa raıy áli de saqtalady, jaýyn-shashyn (jańbyr, qar) eldiń soltústik-batysynda, soltústiginde jáne ortalyǵynda qarǵa ulasady, dep habarlaıdy QazAqparat «Qazgıdromet» RMK-ǵa silteme jasap.
«5 qarashada Soltústik Qazaqstan oblysynda – qatty qar, 6 qarashada Shyǵys Qazaqstan oblysynda, 07-08 qarashada eldiń ońtústik oblystarynda nóser jaýyn (jańbyr, qar) jaýady. Respýblıka boıynsha tuman túsip, kóktaıǵaq bolady, jel kúsheıedi, óńirdiń soltústik jartysynda qarly boran bolady. 7 qarashada Soltústik-batys antıtsıklonynyń enýimen respýblıkanyń batysynda jaýyn-shashyn toqtaıdy», - delingen sınoptıkterdiń habarlamasynda.
Aýa temperatýrasy:
batysta túnde 5 aıaz-5 jyly, kúndiz 0-10 jylydan 2 aıaz – 5 jylyǵa deıin birtindep tómendeıdi;
soltústik-batysta, soltústikte túnde 6 aıaz-5 jylydan 0-8 aıazǵa deıin, kúndiz 3 aıaz-5 jylydan 5 aıaz -2 jylyǵa deıin azdap tómendeıdi;
shyǵysta túnde 3 aıaz-5 jylydan 7 aıaz -2 jylyǵa deıin, kúndiz 5-11 jylydan 3 aıaz -5 jylyǵa deıin azdap tómendeıdi;
ortalyqta túnde 0-8 aıaz, kúndiz 3 aıaz - 5 jyly;
ońtústikte túnde 0-10, kúndiz 3-12 jyly;
ońtústik-shyǵysta túnde 0-8 jyly, taýly aýdandarda 0-5 aıaz, kúndiz 10-15, taýly aýdandarda 3-8 jyly bolady dep kútilýde.
