Aldaǵy úsh kúnde elimizdiń basym bóliginde jańbyr jaýyp, jel soǵady

ASTANA. QazAqparat - 24-26 tamyz kúnderi Qazaqstannyń basym bóliginde kún qubylmaly bolady, naızaǵaı jarqyldap, qatty jel soǵyp, jańbyr jaýady, burshaq jaýýy yqtımal. Bul týraly QazAqparat «Qazgıdromet» RMK-ǵa silteme jasap habarlaıdy.

«Respýblıkanyń batysynda, soltústik-batysynda, soltústiginde jáne shyǵysynda qatty jańbyr jaýyp, aýa temperatýrasynyń birtindep tómendeýi boljanýda. Aýa temperatýrasy respýblıkanyń ásirese soltústik óńirlerinde qatty tómendeıdi. Soltústiktegi aýa temperatýrasy túnde +7-12 gradýs bolsa, kúndiz termometr baǵanalary +17-22 gradýsqa deıin tómendeıdi. Qazaqstannyń tek ońtústigi men ońtústik-shyǵysynda temperatýralyq fonda aıtarlyqtaı ózgerister joq. Mundaǵy kún negizinen jaýyn-shashynsyz bolady dep boljanýda», - delingen sınoptıkterdiń habarlamasynda.