Aldaǵy ýaqytta «jasyl» emes jobalardy qarjylandyrý birtindep qıyndaı túsedi - K.Másimov
ASTANA. QazAqparat - Aldaǵy ýaqytta «jasyl» emes jobalardy qarjylandyrý birtindep qıyndaı túsedi. Búgin QR Prezıdenti janyndaǵy «jasyl ekonomıkaǵa» kóshý jónindegi keńestiń IV otyrysynda QR Premer-Mınıstri Kárim Másimov osylaı málim etti.
«Meniń oıymsha, búgin «jasyl ekonomıkany» damytý baǵytyndaǵy mańyzdy áńgime órbidi, bul pikirtalasty odan ári jalǵastyrýǵa tıispiz. Sonymen qatar, Energetıka mınıstri «jasyl» damýdy nasıhattap, ony ilgeriletetin birinshi adam bolýy kerek», - dedi jıyndy qorytyndylaǵan Premer-Mınıstr. Onyń pikirine qaraǵanda, qazirgi kúni «jasyl damý» boıynsha naqty qadamnan góri áńgime kóbirek. Alaıda, álemdik damýdyń birtindep sózden iske kóshe bastaıtyn kezeńi taqap qaldy.
«Álemde naqty qarajattar tartylmaı bul máseleler týraly «qurǵaq» áńgimeler bolyp jatqanda, osylaı áńgime aıtyp otyra berýge de bolady, biraq odan keler paıda da shamaly. Alaıda, qarjy aǵyndary naqty is-qımylǵa kóshe bastaǵanda, biz shynaıy protsessti ańǵaratyn bolamyz, soǵan qazirden kirise berýge tıispiz. Óıtkeni, búkil álem osy baǵytty ustanýda. Sondyqtan da, aldaǵy ýaqytta «jasyl» emes jobalardy qarjylandyrý qıynǵa aınalady, tipti kele-kele ondaıdan bas tartýymyz da ǵajap emes. Óıtkeni, álem osy joldy ustanyp otyr», - dedi K Másimov. Bul rette Úkimet basshysy «G-20» elderiniń damý úderisine, birinshi kezekte AQSh pen Qytaıdyń damý úderisine nazar aýdardy.
«Biz osy úderisten syrt qalýǵa tıis emespiz. Sosyn, Prezıdenttiń bastamasymen EKSPO-2017 halyqaralyq kórmesi ótetini belgili. Bul Qazaqstannyń «jasyl» damýdaǵy starttyq núktesine aınalýy tıis, osyǵan biz túbegeıli daıyndyqpen kelip, eger qajet bolsa ózimizdiń damý josparymyzǵa tıisti túzetýler de engizýge ázirmiz», - dedi Úkimet basshysy.
