Aldaǵy ýaqytta qazaqstandyq ushqyshtardyń ǵaryshqa ushýy ekitalaı - T. Musabaev
ASTANA. Aqpannyń 23-i. QazAqparat /Qanat Mámetqazyuly/ - Aldaǵy ýaqytta qazaqstandyq ǵaryshkerlerdiń ǵaryshqa ushýy ekitalaı dúnıe bolyp otyr. Búgin QR Parlamenti Májilisinde «Qazaqstan Respýblıkasy men Reseı Federatsııasy arasyndaǵy «Baıqońyr» keshenin tıimdi paıdalaný jónindegi yntymaqtastyqty damytý týraly kelisimdi ratıfıkatsııalaý týraly» zań jobasyn talqylaý barysynda QR Ulttyq ǵarysh agenttiginiń tóraǵasy Talǵat Musabaev osylaı málim etti,
dep habarlaıdy QazAqparat.
«Osy ýaqytqa deıin qazaqstandyq eki ǵaryshker-synaqshy mamandy daıarlaýǵa qatysty birshama qarajat shyǵyndaldy. Bul eki qazaq jigitin osy mamandyqqa ózim tańdap, osy ýaqytqa deıin, tipti Qazaqstannyń azamattyǵyn almaı turǵanda da kóz qyrymdy salyp júrdim. Eki jigit te tolyq jalpyǵaryshtyq ázirlikten ótti, arnaıy dıplomyn alyp shyqty. Endi olardy ǵaryshker-synaqshy dep ataýǵa da bolady. Kúni búginge deıin ǵaryshkerlerdi daıyndaýǵa qatysty jumysqa toqtalatyn bolsam, bul maqsatqa 16 mln. teńgege jýyq qarajat shyǵyndaldy. Endigide bul ǵaryshkerler rezervte bolady. Jalpy, osy ýaqytqa Ulttyq ǵarysh agenttigi kóp kúsh-jiger jumsaǵanyna qaramastan, ushqyshtardyń ǵaryshqa kóterilýine joldary bolmady. Buǵan bir jaǵynan daǵdarys ta salqynyn tıgizdi, bıýdjetten tıisti qarajat qysqaryp qaldy. Osydan 2-3 jyl buryn ǵaryshqa samǵaý quny 26 mln. dollar shamasynda bolatyn. Qazirgi quny kúnnen-kúnge sharyqtap barady. Degenmen, dál qazirgi kúni álemdegi ǵarysh máselesi bir-birimen tyǵyz yqpaldasyp, berik baılanysyp otyrǵandyqtan, qazaqstandyq ǵaryshkerlerdiń kókke kóterilýi ekitalaı dúnıe bolyp otyr», dedi T. Musabaev.
Onyń aıtýynsha, aǵymdaǵy jyldan bastap «Shatl» amerıkandyq zymyran-ǵaryshtyq júıesiniń ushýdy toqtatýyna baılanysty, ǵarysh salasyna qatysty barlyq aýyrlyq Reseıdiń zymyran-ǵaryshtyq keshenine túsip otyr. Bir jaǵynan Reseı endigi kúni ekıpajynda 6 adam bolatyn apparattardy jasaýǵa áreń úlgerýde eken. «Qazaqstandyq ǵaryshkerler eń bolmaǵanda korabldegi bort-ınjener retinde ǵaryshqa ushýyna bolatyn edi, biraq halyqaralyq ǵarysh stansysy kóptegen elderdiń basyn biriktiretin halyqaralyq quqyqqa ıelengeli beri bul másele tym kúrdeli bolyp ketti. Qazaqstan bul halyqaralyq uıymǵa múshe emes. Sonymen birge, buryn Reseı korabl ekıpajy múshelerin ózi tańdaı alatyn bolsa, qazirgi kúni bul másele 16-ǵa jýyq memleketpen kelisilip, júzege asady. Sondyqtan da, ǵaryshqa ushýǵa úlken kezek qalyptasyp qaldy deýge de bolady. Tipti, osydan biraz ýaqyt buryn qarajattaryn tólep qoıǵandar da kezekterin kútip otyr. Ǵarysh korabli ekıpajynyń negizgi quramyna keletin bolsaq, korabl komandıri mindetti túrde Reseı azamaty bolady. Ekinshiden, halyqaralyq ǵarysh stansysyn qarjylandyrýdyń 94-96 paıyzy AQSh-tyń úlesinde bolǵandyqtan, osy eldiń azamaty mindetti túrde ekinshi orynda turady. Osy eki orynǵa eshkim talasa almaıdy. Úshinshi oryn da qazirgi kúni bos emes, bul oryn - Eýropalyq ǵarysh agenttiginiń enshisinde. Onyń ústine, Eýropalyq ǵarysh agenttiginiń quramyna da birneshe memleket kiredi, tipti osydan biraz buryn ushýǵa qatysty aldyn ala qarjysyn tólep qoıyp, kútip otyrǵandar da osylar», dedi T. Musabaev.
