Aldaǵy ýaqytta dándi daqyldar, aýyl sharýashylyǵy, jaıylymdarda mal ósirý máseleleri jolǵa qoıylady - Elbasy

ASTANA. 4 sáýir. QazAqparat /Marlan Jıembaı/ - Aldaǵy ýaqytta dándi daqyldar, aýyl sharýashylyǵy, jylyjaı, jaıylymdarda mal ósirý máseleleri jolǵa qoıylady. Bul týraly búgin Aqordada sheteldik jáne otandyq BAQ ókilderine arnalǵan baspasóz máslıhatynda Elbasy Nursultan Nazarbaev aıtty.

Elbasynyń atap ótýinshe, 2003 jyldan bastap memleket aýyl sharýashylyǵyna zor kóńil bólip keledi. Osy aralyqta atalǵan sektordy qoldaýǵa el qorjynynan 670 mlrd. teńge bólindi. «Kóp jaǵdaıda biz aýyl sharýashylyǵyna sýbsıdııa, ıaǵnı qaıtyp kelmeıtin memlekettiń aqshasyn berip otyrmyz. Sonyń arqasynda, ásirese dándi daqyldardyń ónimi keıingi kezde kóńilden shyqty. Byltyrǵy qurǵaqshylyq jyldyń ózinde biz tek qana sol kómektiń arqasynda ortasha ónim aldyq», - dedi N.Nazarbaev.

Memleket basshysynyń paıymynsha, osyndaı qoldaýdyń arqasynda aýyl sharýashylyǵynda jańa tehnologııa engizilip, jańa kombaındar, mashınalar satyp alyndy, ozyq agrotehnologııa qoldanyla bastady.

Endigi kezekte shyǵaratyn aýyl sharýashylyǵy ónimderin óńdeý máselesi turǵandyǵyn basa aıtqan Elbasy qazirgi ýaqytta mal sharýashylyǵyn damytý qolǵa alynǵandyǵyn tilge tıek etti. «52 mal bordaqylaıtyn pýnktter ashylyp, onyń tóńireginde 2300 shaǵyn fermerlik bıznester bolady. Mıllıonǵa jaqyn adamdarǵa aýylda jumystar ashylady. Sondyqtan dándi daqyldar, aýyl sharýashylyǵy, jylyjaı máseleleri, ońtústiktegi kókónis pen basqa jaǵdaılar, soltústikte bıdaı óndirý, dalalarymyzda, jaıylymdarda mal ósirý máselesi jolǵa qoıylatyn bolady. Bunyń barlyǵy meniń baǵdarlamamda aıtylǵan», - dedi Prezıdent.