Aldaǵy ýaqytta biz ındýstrııalandyrý baǵdarlamasy ıgiligin barynsha molynan sezinetin bolamyz - Á.Isekeshev

ASTANA. 13 maýsym. QazAqparat - Aldaǵy ýaqytta biz ındýstrııalandyrý baǵdarlamasy ıgiligin barynsha molynan sezinetin bolamyz. «Egemen Qazaqstan» gazetine bergen suhbatynda QR Premer-Mınıstriniń orynbasary - QR Indýstrııa jáne jańa tehnologııalar mınıstri Áset Isekeshev osylaı málim etken.

Basylymnyń «Siz kúndelikti turmys jaǵdaıynda ındýstrııalandyrý jemisin kórip júrsiz be?», degen saýalyna jaýap bergen ol: «Árıne, úsh jyl ishinde barlyq ónim túrlerin shyǵarý óndirisin qurý múmkin emes. Solaı bola tursa da, biz elimizde buryn eshqashan óndirilip kórmegen 200-den astam ónim óndirýdi josparlap otyrmyz. Onyń ishinde 140 ónim túri qazirdiń ózinde shyǵarylýda. Máselen, óz basym, Qazaqstanda shyǵarylǵan avtokólikpen júremin. Meniń balalarym «Mımıorıkı» fırmasynyń kıimderin kıedi. Osynyń bári tamasha qazaqstandyq ónimder. Sonymen birge, osy baǵdarlama sheńberinde elimizde kóptegen sapaly azyq-túlik ónimderin shyǵarý máselesi jolǵa qoıyldy. Turmysta jergilikti óndiris oryndary shyǵaratyn «LG» tońazytqyshtary, teledıdarlary, kir jýatyn mashınalary qoldanylady. Búginde elimizde boı kótergen qurylys nysandarynda ındýstrııalandyrý baǵdarlamasy sheńberinde Qazaqstanda shyǵarylatyn qurylys materıaldary paıdalanylady. ÚIID baǵdarlamasy sheńberinde dúnıege kelgen óndiris ónimderi bizdiń ómirimizde, turmysymyzda barynsha keńinen oryn ala bastady. Aldaǵy ýaqytta biz ındýstrııalandyrý baǵdarlamasy ıgiligin barynsha molynan sezinetin bolamyz», - dedi.