Aldaǵy senbide «Juldyzdy sát» jobasynyń úshinshi ondyǵy baq synaıdy
ASTANA. 21 mamyr. QazAqparat - Mamyrdyń 25 kúni keshki saǵat 21.05-te «Juldyzdy sát» jobasynyń kezekti úshinshi ondyǵy baq synaıdy, dep habarlady «Qazaqstan» AQ» rspýblıkalyq teleradıo kesheniniń baspasóz hatshysy Tanakóz Tolqynqyzy. Olardyń arasynda ár kezeń saıyn sahnada rekord jańartýdy kózdegen Sergeı Tsyrýlnıkov, shısha laqtyrýdyń sheberi «Galaktık shoý» toby, jylandardy baǵyndyrǵan Aıym Mahmetova jáne daýylpazdar men bulbul daýysty ánshiler bar.
San túrli óner ıeleriniń basyn qosqan «Juldyzdy sát» jobasynyń tartysy sharyqtaý shyńyna kóterilip, doda endi qyzyp keledi. Jartylaı fınalda óner kórsetken eki ondyq óz ónerlerin ortaǵa salyp, kórermendi tánti etti. Alǵashqy ondyqta halyqty qaıratymen qaıran qaldyrǵan Esimbek Toqjigitov, qazaqtyń qara óleńin naqyshyna keltirip oqyǵan bes jasar búldirshin Ásken Shaımerden, saksafonda sheber oınaıtyn Ilıa Tsıbýlskıı jáne balalar úıiniń tárbıelenýshilerinen quralǵan «Vıktorııa» bıshiler toby óner kórsetti. Sonymen qatar erekshe akrobattyq qımylmen tańdaı qaqtyrǵan Anna Demıdova jáne eptiligimen kórermen kózaıymyna aınalǵan Inabat pen Dılara Jorabekterdi aıta ketken jón. Ásirese, sırek kezdesetin pantomıma janryndaǵy «Eki ezý» satıra teatrynyń qoıylymy kórermen kóńilin bir serpiltip tastady. Jadyra Ótemisova, Dınara Namııaly jáne Janbol Tóleshev syndy jas ánshiler daýysynyń erekshe tembri tyńdarmandar júregin jaýlap aldy. Óneri birinen biri asqan ónerpazdardyń ishinen ekeýin ǵana iriktep alý kórermenderge ońaı soqpady. Degenmen halyq óz tańdaýyn jasady. «Eki ezý» teatry kóp daýys jınap, aqtyq synǵa birden joldama aldy. Al Dınara Namııaly men Janbol Tóleshevtiń jınaǵan daýysy teń túsip, qazylar alqasy aqtyq synǵa Dınarany laıyqty dep tapty. Osylaısha «Eki ezý» teatry men Dınara Namııaly alǵashqy ondyqtyń jeńimpazdary atandy.
Jartylaı fınaldyń alǵashqy kúninen soń kórermen ekinshi on úmitkerdiń ónerin asyǵa kútti. Araǵa apta salyp «Juldyzdy sát» kezekti on úmitkerdi tikeleı efırge shyǵardy. Bul joly da myńdaǵan úmitkerdiń ishinen sýyrylyp shyqqan naǵyz talanttar ǵana baq synady. Aqbaevtar otbasy men «Balaýsa» ujymy akrobattyq nómirin kórsetti. Al «Juldyzdy sát» úmitkerleriniń ishindegi jalǵyz sýretshi Bazar Yrystanuly kózdi ashyp-jumǵansha erekshe tásilmen aqqýdyń sýretin salyp shyqty. Abbos Abdýllaev sahnada adamdy ekige bólip, eldi tań qaldyrdy. Al Aıdos dúıim jurttyń kóz aldynda toqqa qosylyp turǵan uzyn burǵyny jutyp, kórermenniń úreıin ushyrdy. Sonymen qatar, Ásel Quljanova, Ardaq Kenjesarın, Ermek Baljigit tamyljyta án salyp, kórkem sóz sheberi atanǵan Qadısha Baqbergenqyzy mánerlep óleń oqydy. Bul joly «Juldyzdy sátke» baryn salyp muqııat daıyndalyp kelgen ónerpazdardyń ishinen Ermek Baljigit pen Ásel Quljanovanyń joly bolyp, aqtyq synǵa ótti.
Osy tartysqa toly eki apta talantty jandardyń ónerlerin ǵana emes, olardyń tózimderin de synǵa alǵan sekildi. Bul joba tipti halyq arasynda da qyzý pikirtalasqa aınalǵan. Biri óz ónerpazynyń aqtyq synǵa ótpeı qalǵanyna kúıinse, biri joly bolǵan úmitkerge qoldaý kórsetip jatyr. Baǵalaý SMS arqyly ótkendikten, qatysýshynyń baǵyn halyq joldaǵan daýys sheshedi. Habar bastala salysymen-aq kórermen ózi unatqan ónerpazyna SMS jiberip úlgerý qajet.
Daýys berý úshin ónerpazdyń rettik sanyn 3075 qysqa nómirine SMS arqyly joldaý nemese 8 80 90 80 30 75 nómirine qońyraý shalý qajet. «Juldyzdy sát» jobasynyń úshinshi ondyǵynda óner kórsetetin úmitkerler mynalar:
ÚMІTKERLER: rettik sany
1 «Eksklıýzıv» ujymy 1
2 Arman Qarynsaý 2
3 Aıym Mahmetova 3
4 Sergeı Tsyrýlnıkov 4
5 Karına Rahmetola 5
6 Ádilet Qalıev 6
7 Nurjan Jákenov, Erzat Qajybekov 7
8 «GALAKTIC FLAIR» toby 8
9 Nurlan Túkenov 9
10 Baqyt Júndibaev, Rafael Mırgalımov 10
