Aldaǵy saılaýǵa halyqtyń qyzyǵýshylyǵy artty - máslıhat depýtaty Abbat Órisbaev
NUR-SULTAN. QazAqparat – 2021 jyldyń 10 qańtarynda elimizde QR Parlamenti Májilisiniń jáne barlyq deńgeıdegi máslıhattardyń depýtattaryn saılaý ótetini belgili. Osy oraıda Mańǵystaý oblystyq máslıhat depýtaty Abbat Órisbaev bıylǵy saılaýdyń ereksheligine qatysty pikir bildirdi, dep habarlaıdy QazAqparat tilshisi.
«Sońǵy aılarda koronavırýs ınfektsııasynan keıin belsendi talqylanyp júrgen taqyryptardyń biri aldaǵy saılaý naýqanyna qatysty bolyp tur. Máselen, «Nur Otan» partııasyndaǵy praımerezdiń ózi jańashyldyqtar engizdi. Jalpy, aldaǵy saılaýǵa daıyndyq aıasynda halyqtyń qyzyǵýshylyǵy artty. Osy oraıda halyqtyń saıası saýattylyǵy da joǵarylady desek bolady», - dedi A. Órisbaev.
Osy oraıda ol partııalarda aldaǵy naýqanǵa daıyndyq baǵytynda belsendilik artyp kele jatqanyn jetkizdi.
«Atap aıtqanda, saılaý aldyndaǵy sharalar kezinde syn da aıtyldy. Syn bolǵan jaqsy – ol ashyqtyqty jarııalaıdy. Depýtattyqqa úmitkerlerdiń sapasy artty degen oıdamyn. Zaman talabyna saı, bilikti kandıdattar kerek ekeni túsinikti ǵoı. Erteń Parlamentte halyq senim artqan kandıdat ózekti máselelerdi kótermese, onda nátıje bolmaıdy. Sondyqtan jaýapkershilikti barshamyz túsinýimiz kerek. Qazirgi kezde úmitkerler áleýmettik jeliler ózderiniń josparlap otyrǵan qadamdaryn jarııalap qoıdy. Bul turǵyda olar osy josparlaryn oryndaýǵa tyrysady degen oıdamyn, óıtkeni halyq tarapynan suraý bolady», - dedi sarapshy.
Sonymen qatar, ol partııalyq tizimge jastar men áıelderdiń úlesi úshin 30 paıyzdyq kvota bólinýine pikir bildirdi.
«Bul qadamdy tolyq qoldaımyn. Osy rette áıelder men jastardyń Parlament pen máslıhattar qyzmetine kóbirek qatysýyn qamtamasyz etýge múmkindik beredi. Sapaly reformalar qajet ekeni túsinikti, halyqtyń ózi osyny qajet etedi. Eger mundaı sharalar iske asyrylmasa, teris nátıje bolýy yqtımal, ıaǵnı turaqtylyqqa qaýip tónedi. Meniń oıymsha, iske asyrylyp jatqan sharalar ýaqytyly jasalyp jatyr. Bul rette, tsıfrlyq tehnologııalar, onlaın rejımdegi baılanystar ońtaıly nátıje berip otyr. Sebebi túsindirý sharalaryna ekpin qoıylyp, saılaýshylardyń belsendigin kóterýge yqpal etedi», - dedi A. Órisbaev.
Onyń paıymynsha, aldaǵy ýaqytta da tıisti reformalardy jalǵastyrý kerek.
«Saılaýdyń ashyqtyǵy úshin úkimettik emes uıymdarmen qatar, árbir azamat jaýapkershilik tanytýy kerek. Baıqaýshyǵa úlken jaýapkershilik júkteledi, ony abyroımen atqarǵan jón. Barlyǵy qoǵamnyń qolynda, barlyq ıgi qadamdy ózimizden bastaýymyz qajet», - dedi Abbat Órisbaev.
