Aldaǵy saılaýda Parlamentke, Úkimetke jańa adamdardyń kelýine múmkindik bolady – Senat tóraǵasy
«Memleket basshysy elimizde kezekten tys Prezıdent saılaýyn, Májilistiń saılaýyn ótkizý týraly usynys aıtty. Bul usynysty tolyqtaı qoldaımyz. Jalpy, osyndaı qadamǵa barýdyń birneshe naqty sebebi boldy. Birinshiden, elimizde úlken saıası reformalardyń júzege asyp jatqanyn bilesizder. Osyndaı reformalardyń aıasynda úlken ózgerister bolyp jatyr. 5 maýsym kúni referendýmda Konstıtýtsııamyzǵa ózgerister engizdik. Ary qaraı osy saıası-ekonomıkalyq reformalar jalǵasatyn bolady», - dedi M. Áshimbaev.
Osy oraıda ol halyqtyń qoldaýy arqyly aladaǵy ózgeristerdi iske asyrý múmkin bolatynyn aıtty.
«Sondyqtan elimizdegi osy jaǵdaıdy, qańtarda bolǵan tragedııalyq oqıǵalardy eskerip, tıisti ózgerister bolyp jatyr. Túbegeıli reformalardy jalǵastyrý úshin bılik tarmaqtaryna, Prezıdentke, Úkimetke, Májiliske, Senatqa, máslıhattarǵa halyqtyń mandaty kerek. Halyq qoldasa, onda sol mandatty alyp, ara qaraı túbegeıli reformalardy jalǵastyrýǵa múmkindik bolady», - dedi Senat tóraǵasy.
Sonymen qatar M.Áshimbaev kelesi jyly ótetin saılaýdan keıin Parlamentke túrli salanyń mamandary keletinin atap ótti.
«Ekinshiden, sońǵy aılarda bılikke jańa adamdar kelýi kerek degen másele kóterilip jatyr. Basqa salalarda qyzmet etip júrgenderdiń, qoǵamdyq jumystaǵylar, bıznestegi mamandardyń, ǵylymdaǵy azamattardyń kelýi týraly usynystar aıtylyp otyr. Sondyqtan aldaǵy saılaýlardy ótkizý arqyly Májiliske, Senatqa, máslıhattarǵa, Úkimetke jańa adamdardyń kelýine múmkindikter týady. Bul saılaýlar reformalardyń jalǵasy jáne onyń nátıjesinde jańa qoǵamdyq uıymdar ókilderiniń, jańa saıası partııalardyń bılik tarmaqtaryna kelýine jol ashylady», - dedi Senat tóraǵasy.
Budan uryn habarlanǵandaı, bıyl qyrkúıek aıyndaǵy Joldaýynda Memleket basshysy kúzde kezekten tys Prezıdent saılaýyn ótkizýdi usyndy.
«Eski tásil boıynsha saılanǵan bıliktiń ókildi organdarynyń kezekten tys saılaý naýqany arqyly jańarýy zańdylyq. Sondyqtan Májilistiń jáne barlyq deńgeıdegi máslıhattardyń saılaýyn kelesi jyldyń birinshi jartysynda ótkizýdi usynamyn», - dedi Qasym-Jomart Toqaev.
