Aldaǵy saılaý jahandyq ahýal turǵysynda Qazaqstan úshin ońtaıly ózgerister alyp keledi - ıÝlııa Denısenko
ASTANA. QazAqparat - Saılaýdyń merziminen buryn ótkizilýi búgindegi jahandyq ahýal turǵysynda Qazaqstan úshin ońtaıly ózgerister alyp keledi.
Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte Dinderdi zertteý ortalyqtary qaýymdastyǵynyń dırektory ıÝlııa Denısenko málim etti.
«Sońǵy prezıdettik saılaýda Qazaqstan azamattary daýys berýge qatysý belsendigi boıynsha óte joǵary nátıje kórsetkeni belgili. Endi parlamenttik saılaý aınalysyndaǵy belsendi talqylaýlardy eskere otyryp, bul turǵydaǵy kórsetkishter de tıisti deńgeıde bolady degen oıdamyn. Atap aıtqanda, adamdar saılaýǵa qatysýdy ózderiniń saıası jáne azamattyq quqyqtaryn júzege asyrý retinde qabyldaıdy, bul óz kezeginde eldiń qoǵamdyq-saıası ómiriniń serpini bolyp tabylady. Merziminen buryn ótetin saılaý búgindegi jahandyq ahýal turǵysynda Qazaqstan úshin ońtaıly ózgerister men eldiń damýyna jańa qarqyn alyp keletini anyq»,-dedi ıÝ. Denısenko.
Osy oraıda ol ótken aptada Májilis depýtattarynyń QR Prezıdentine Májilisti merziminen buryn taratý jáne kezekten tys saılaý taǵaıyndaý týraly Jarlyǵyn qabyldaý týraly bastamasy aldaǵy tereń reformalar men álemdik qarjylyq naryqtardaǵy ahýalǵa baılanysty ózekti bolyp otyrǵanyn atap ótti.
«Saılaýdy jyldyń sońynda emes, naýryz aıynda ótkizý eń qolaıly ári utymdy sheshim dep paıymdaımyz»,-dep túıdi ol.
