Aldaǵy saılaý elimizdiń saıası ómirinde mańyzdy rólge ıe - Q.Turǵanqulov
ASTANA. QazAqparat - Aldaǵy saılaý elimizdiń saıası ómirinde mańyzdy rólge ıe. Búgin QR Parlamenti Májilisi men máslıhat depýtattary saılaýyn ázirleý jáne uıymdastyrý máseleleri jónindegi respýblıkalyq semınar-keńeste sóz sóılegen QR Ortalyq saılaý komıssııasynyń tóraǵasy Qýandyq Turǵanqulov osylaı dedi.
«Ózderińizge belgili, Memleket basshysynyń Jarlyǵyna sáıkes Parlament Májilisi depýtattaryn saılaý 2016 jyldyń 20 naýryzyna belgilendi. Sonymen qatar biz máslıhattar depýtattary saılaýyn da sol kúni ótkizý týraly tıisti qaýly qabyldadyq. Aldaǵy saılaý elimizdiń saıası ómirinde mańyzdy rólge ıe bolatyny sózsiz. Sebebi onyń nátıjesi elimizdiń odan ary damýyn aıqyndaıtyn bolady», - dedi ol.
Osy oraıda OSK tóraǵasy aldaǵy basty maqsat - saılaýdyń zańdylyǵyn jáne ádil ótýin qamtamasyz etý ekenin keńeske qatysýshylardyń qaperine salyp ótti.
«Bul maqsatty tıimdi iske asyrý úshin barlyq qajetti resýrstar bar. Saılaý naýqany 2 aı ishinde ótkiziletin bolady. Al bul merzim ishinde biz kóptegen is-sharalardy iske asyrýymyz qajet. Osyǵan oraı aldaǵy ýaqytta bizdi jaýapty kezeń kútip tur. Bul jumys bárimizge tanys. Sondyqtan osy synnan bárimiz súrinbeı abyroımen ótetindigimizge senimdimin», - dedi Q.Turǵanqulov.
