Aldaǵy referendým – saıası reformalardyń mańyzdy kezeńi - senator
NUR-SULTAN. QazAqparat – Qapshaǵaı qalasynyń atyn ózgertýge arnalǵan saltanatty is-sharaǵa qatysqan QR Parlamenti Senatynyń depýtattary Nurtóre Júsip pen Dınar Nóketaeva Qonaev qalasynyń turǵyndarymen aldaǵy referendým jóninde pikir almasty, dep habarlaıdy QazAqparat Palatanyń baspasóz qyzmetine silteme jasap.
Senatorlar aldaǵy referendým men konstıtýtsııalyq reformanyń negizgi baǵyttaryn talqylady.
«Konstıtýtsııaǵa ózgerister men tolyqtyrýlar engizý jónindegi referendým - Memleket basshysy bastamashylyq etken saıası reformalardyń mańyzdy kezeńi. Biz 5 maýsymda usynylǵan aldaǵy ózgeristerdiń baǵyttary boıynsha tańdaý jasaıtyn bolamyz. Daýys berý qorytyndysy Qazaqstannyń sońǵy jyldary barlyq salalardy reformalaý boıynsha júrgizip jatqan aýqymdy jumysyna qoǵamdyq qoldaýdyń joǵary deńgeıin kórsetetinine senimdimin»
, - dep atap ótti Nurtóre Júsip.
Sondaı-aq, qalaǵa Qonaev atyn berý týraly sheshimge qatysty oı bólisti.
«Qapshaǵaı ataýyn Qonaev dep ózgertý - qala turǵyndary úshin kópten kútken mańyzdy oqıǵa boldy. Sonymen qatar, Memleket basshysy Qasym-Jomart Toqaevtyń qala ataýyn ózgertý jónindegi bastamasyn qalalyqtardyń basym kópshiligi qoldaǵanyn atap ótkim keledi. Bul bizdiń uly saıası jáne qoǵam qaıratkeri Dinmuhamed Qonaevtyń eńbeginiń mańyzyn kórsetedi»
, - dedi senator Dınar Nóketaeva.
Kezdesý barysynda qala turǵyndarymen jáne basshylyǵymen oblys ortalyǵynyń damý keleshegi, sondaı-aq eldi mekenniń mártebesin arttyrýdyń óńirdegi barlyq turǵyndarǵa mańyzdylyǵy talqylandy.
Eske sala keteıik, Qapshaǵaı qalasyna Dinmuhamed Qonaevtyń esimi berilýine baılanysty shaharda saltanatty sharalar uıymdastyryldy.
