Aldaǵy mereke kúnderi kólik polıtseıleri kúsheıtilgen rejimde qyzmet atqarmaq
ASTANA. QazAqparat - 2014 jyldyń 31 jeltoqsany men 2015 jyldyń 4 qańtary, sondaı-aq jańa jyldyń 7-8 qańtary aralyǵynda QR ІІM Kóliktegi ishki ister departamentiniń jeke quramy Jańa jyl jáne Pravoslavıe Rojdestvo merekeleri kezinde quqyqtyq tártip pen qoǵamdyq qaýipsizdikti qamtamasyz etý maqsatynda qyzmet ótkerýdiń kúsheıtilgen nysanyna kóshiriledi, dep habarlaıdy vedomstvodan.
«Mereke kúnderi qoǵamdyq tártipti qamtamasyz etip, qylmys pen quqyq buzýshylyqtyń aldyn-alýǵa erekshe nazar aýdarylady. Departamenttiń 900-den asa qyzmetkeri aýmaqtyq ІІD-men birlese otyryp, elimizdiń 127 temir jol vokzaly men 16 áýejaıynda jolaýshylardyń qaýipsizdigin kúzetip, qylmystardyń aldyn alady», - dedi Departament basshysynyń orynbasary polıtsııa polkovnıgi Talǵat Ótetileýov.
Ol úshin oqıǵa ornyna jedel shyǵý jáne qylmystardy izin sýytpaı ashýdy qamtamasyz etý maqsatynda qosymsha arnaıy jedel tergeý toby qurylmaq.
Sondaı-aq qoǵamdyq oryndarda, mádenı-buqaralyq is-sharalar ótkizý oryndarynda quqyqbuzýshylyqtardyń aldyn alý jáne jolyn kesý boıynsha qosymsha sharalar qabyldanatyn bolady.
