Aldaǵy kúzde Talǵat Temenovtyń "Meniń kúnáli perishtem" atty fılmi prokatqa shyǵady
ATY. 10 maýsym. QazAqparat /Názıra Eleýhan/ - Búgin Almatyda "Qazaqfılm" kınostýdııasynyń Ton stýdııasynda rejısser Talǵat Temenovtyń "Meniń kúnáli perishtem" atty fılminiń BAQ ókilderine arnalǵan kórsetilimi boldy.
Fılmniń rejısseri men stsenarıı avtory Talǵat Temenov. Janry - jastar kınosy. Fılmniń bıýdjeti - 2,5 mıllıon AQSh dollary.
Fılm arman qýyp Parıjge ketkisi keletin jas qyzdyń ómirinen syr shertedi. Aıshanyń súıikti jigiti bola turyp, armanyna jetý úshin demeýshilik tanytyp júrgen baı jigitpen kóńil qospaq bolady. Boıjetken asqaq armanynyń oryndalýyn tańdaı ma, álde júrek lúpiliniń ámirimen shynaıy mahabatty tańdaı ma? Ony kınosúıer qaýym kúzde ekranǵa shyqqan kezinde biletin bolady.
Basty rólderdi buǵan deıin kınoǵa túspegen jas ártister - Danııar Qanatqalıev (Azamat) pen Quralaı Anarbekova (Aısha) oınaıdy. Al baı kásipker Ashat Babaevıchtiń rólin - Qazaqstannyń eńbek sińirgen ártisi Murat Ahmanov somdaıdy. Fılmge sonymen qatar álemge tanymal akter - Jerar Deparde túsken.
"Túsirilimder Almaty qalasynyń, elimizdiń jáne Frantsııanyń eń ásem, kórikti degen jerlerinde jasaldy. Týyndy qazaq halqynyń jaqsy dástúrlerin kórsetetin, ádemilikti, mahabbatty, dostyqty, adamgershilikti, kisilik pen kishilikti, sezimtaldyqty pash etetin fılm. Munda esh jaǵymsyz keıipker joq. Meniń oıymsha, bul kórermen kóńilinen shyǵatyn fılm bolady. Tipti "Mahabbat beketi" fılminen asyp túsetin, tanymaldylyqqa ıe bolatyn fılm bolatynyna senemin",-dedi Talǵat Temenov.
Onyń aıtýynsha, jańa týyndynyń tusaýkeser rásimi bıylǵy jyldyń kúz aıynda, 15 qyrkúıek kúni ótkizilmek.
