Aldaǵy kúnderi Úkimet esirtkige qarsy is-qımyldyń keshendi josparyn bekitedi

ASTANA. QazAqparat – 2016 jyldan bastap Qazaqstanda esirtkige qarsy is-qımyldy retteıtin arnaıy qujat bolǵan joq. Bul týraly Túrkistanda ótip jatqan Ulttyq quryltaıda Prezıdent Qasym-Jomart Toqaev aıtty, dep habarlaıdy QazAqparat tilshisi.

«Qazaqstanda 2016 jyldan bastap esirtkige qarsy is-qımyldy retteıtin arnaıy qujat bolǵan joq. Sondyqtan byltyrǵy Joldaýymda keshendi jospar daıyndaýdy tapsyrdym. Aldaǵy kúnderi Úkimet osy mańyzdy qujatty qabyldaıdy. Onyń sheńberinde júıeli jumys júrgiziletin bolady. Tájirıbeli zańger Serik Aqylbaı kótergen quqyqtyq sanany qalyptastyrý máselesi de ózekti. Jastardyń quqyqtyq saýattylyǵyn arttyrý óte mańyzdy. Sonda árkim óz quqyǵyn qorǵaı alady jáne basqalardyń quqyǵyn buzbaıdy. Eger bizdiń elimizde zań men tártip ornasa, onda ol memleketimizdiń myzǵymas irgetasyna aınalady», - dep usynys bildirdi Qasym-Jomart Toqaev.

Memleket basshysy bul baǵyttaǵy jumystardy jetildirý úshin polıtsııanyń tıimdiligin arttyrý qajettigin jáne atalǵan másele óz baqylaýynda bolatynyn atap ótti.