Aldaǵy kúnderi Qazaqstannyń soltústigi men ortalyǵynda aıaz kúsheıedi
ASTANA. 21 aqpan. QazAqparat - Aldaǵy táýlikterde elimizdiń Shyǵys bóliginde atmosferalyq fronttardyń yqpalynan qar jaýyp, burqasyn baıqalyp, jeldiń kúsheıýi saqtalady, keı jerlerde tuman, kóktaıǵaq bolýy yqtımal.
Bul týraly Qazgıdromettiń baspasóz qyzmeti habarlap otyr.
Qalǵan aımaqtarda sýyq antıtsıklonnyń áserinen ashyq kún-raıy kútilýde, sondaı-aq respýblıkanyń soltústigi jáne ortalyǵynda aýa temperatýrasy túnde -33 gradýs aıazǵa deıin tómendeıdi, al kúndiz -22 gradýsty quraıdy. Degenmen, aptanyń sońyna qaraı bul yzǵar elimizdiń shyǵys jáne ońtústik-shyǵys óńirlerine jyljıdy.
Demalys kúnderi batys aımaqtarda jel kúsheıip, ekpini 23 m/s-qa deıin jetedi. Kelesi aptanyń basynda elimizdiń basym bóliginde aýa temperatýrasy joǵarylap, kún jylymyq tanytady, alaıda batys aımaǵyna Skandınavııa óńirlerinen kezekti sýyq aýa massalary keledi.
