Aldaǵy eki jylda aýyl turǵyndary tolyǵymen keń jolaqty ınternetpen qamtylady - Baılanys jáne aqparat mınıstri
ANA. 6 jeltoqsan. QazAqparat /Qanat Mámetqazyuly/ - Aldaǵy eki jyl kóleminde aýyl turǵyndary tolyǵymen keń jolaqty ınternetpen qamtylady. Bul týraly búgin QR Parlamenti Májilisinde aqparattyq-kommýnıkatsııalyq tehnologııalardy damytý taqyrybynda ótken Úkimet saǵatynda Baılanys jáne aqparat mınıstri Asqar Jumaǵalıev málim etti.
«Aýyldyq jerlerdegi ınternetti damytý baǵdarlamasy boıynsha BLL, SDMA-450 júıesi tehnologııalaryn engizýdi odan ári josparlap otyrmyz. Kelesi jyldyń qańtarynda bul tehnologııa Qostanaı oblysynda júzege assa, jalpy 2011-2012 jyldardyń ishinde barlyq oblys aımaqtary sondaı tehnologııamen qamtylady. Nátıjesinde aýyl turǵyndary da keń jolaqty ınternetti paıdalana alatyn bolady», - dedi A. Jumaǵalıev.
Sonymen qatar, ınternettiń qazaqstandyq kontentin damytý máselesine toqtalǵan vedomstvo basshysy, mınıstrliktiń bastamasymen áleýmettik saıttar úshin tegin hostıng berilip otyrǵanyn atap ótti. Bundaı saıttyń sany 24-ke jetken. Bul jumys ta jalǵasatyn bolady. Budan bólek, memlekettik organdardyń baspasóz hatshylary úshin de ınternet-jýrnalıstıka kýrstary ótkizilip, Halyqaralyq aqparattyq tehnologııalar ýnıversıtetinde Elektrondyq jýrnalıstıka fakýlteti ashylǵan. «Elektrondyq kommertsııany damytý maqsatynda ınternet qaýymdastyǵymen birlesken is-sharalardy bekitip, jumys jasaýdamyz. Sonymen birge, memlekettik tilde kontentti damytý maqsatynda jańa portaldar ashylýda. Jańa ınternet resýrstaryn ashýdy alda da jalǵastyratyn bolamyz», - dedi mınıstr.
