Aldaǵy eki kúnde Syrdarııada sý deńgeıi kóterilip, 4 aýdanǵa qaýip tóndirýi múmkin
ShYMKENT. QazAqparat - Ońtústik Qazaqstan oblysyna qaraı aqqan shamadan tys tasqyn sý saldarynan Shardara sý qoımasynda sý deńgeıiniń kóterilý qaýpi bar, dep habarlaıdy «QazAqparat HAA tilshisi.
Oblystyq tótenshe jaǵdaılar departamentiniń bastyǵy Nurbolat Derbisovtiń aıtýynsha, Ózbekstan gıdrometinen kelgen eskertýge sáıkes, «sáýirdiń 22-24 kúnderi Syrdarııa ózenine sekýndyna 1,8-2 mln tekshe metr sý keledi degen boljam bar. Óıtkeni Syrdarııa ózenine keletin sý shyǵyny Chınaz beketinde sekýndyna 1,5 - 1,6 myń tekshe metrge, al Shyrshyqtyń tómengi aǵysynda sekýndyna 500-550 tekshe metrge jetken. Óz kezeginde Syrdarııa ózeni boıynsha Ózbekstan aýmaǵyna sýdyń shamadan tys kelýi saldarynan Shardara sý qoımasynda sý ulǵaıa túsetindigin málim. Al Shardara sý qoımasynyń sıymdylyǵy 5,2 mlrd tekshe metr bolsa qazir onda 4 mlrd 886 mln tekshe metr sý bar. Qazirgi tańda kelip jatqany sekýndtyna 1,5 myń tekshe metrdi qurap otyr. Departament basshysynyń sózinshe, eger kórshi elden kóp sý kelgen jaǵdaıda Arys, Otyrar, Shardara aýdandary men Túrkistan qalasynyń keı eldi mekenderin sý basýy múmkin. Sondyqtan tótenshe jaǵdaıdy boldyrmaý úshin óńirde saqtyq sharalary kúsheıtilip jatyr.
