Aldaǵy dúısenbi Grýzııada qaraly kún bolyp jarııalandy

ASTANA. QazAqparat - Grýzııada dúısenbi, 27 qarasha  Batýmıdegi qonaq úıdegi órtte qaza tapqandardy aza tutý kúni dep jarııalandy. Bul týraly Grýzııa úkimetiniń saıtynda habarlandy.

«Anadolý» agenttiginiń habarlaýynsha, Grýzııa ІІM-niń málimetinde Batýmıdegi bes juldyzdy «Leogrand» qonaq úıindegi órtte 11 adam qaza taýyp, 21 adam zardap shekkendigi kórsetilgen. Jergilikti BAQ zardap shekkenderdiń qatarynda Túrkııanyń azamattary da bar dep jazýda. Mert bolǵandardyń biri Iran azamaty. Zardap shekkenderdiń ómirine qaýip tónip turǵan joq.

Brıýsseldegi «Shyǵys seriktestigi» sammıtine attanǵan Grýzııanyń premer-mınıstri Georgıı Kvırıkashvılı oqıǵaǵa baılanysty qaza tapqandardyń jaqyndaryna kóńil aıtty.

Kvırıkashvılı Grýzııa bıligi qaıǵyly oqıǵany jan-jaqty tekserýge jáne kinálilerdi jaýapqa tartýǵa ýáde berdi.