Aldaǵy demalys kúnderi elimizde qar jaýyp, burqasyn soǵady
ASTANA. QazAqparat - Sınoptıkter 19-21 qańtardaǵy aýa raıyna arnalǵan boljamyn jarııa etti, dep habarlaıdy QazAqparat Qazgıdrometke silteme jasap.
Demalys kúnderi elimizdiń soltústik bóliginde qar jaýyp, burqasyn soǵady, ońtústikte jańbyr, arty qarǵa ulasady dep boljanyp otyr.
«Ortalyq Azııa aımaǵynan Qazaqstanǵa ońtústik tsıklony jyljıdy, ol jylý alyp keledi. Sondyqtan aldaǵy demalys kúnderi elimizdiń soltústik bóliginde qar jaýyp, burqasyn soǵady, batystan qatty jel soǵady. Al ońtústik jáne batys óńirlerde jaýyn-shashyn bolady, jańbyrdyń aıaǵy qarǵa ulasady, taýly aımaqtarda qalyń qar túsedi, tuman jáne kóktaıǵaq kútiledi», - delingen habarlamada.
Dúısenbide sýyq aǵyndardyń ótýine baılanysty aýa temperatýrasy tómendeıdi, biraq ol áli de klımattyq normadan joǵary bolmaq.
