Aldaǵy demalys kúnderi Astanada SQO-nyń aýyl sharýashylyǵy jármeńkesi ótedi

PETROPAVL. QazAqparat – Áleýmettik mańyzy bar azyq-túlik taýarlary baǵasyn turaqtandyrý maqsatynda 8-9 qazan kúnderi Astana qalasynda Soltústik Qazaqstan oblysy aýyl sharýashylyǵy taýaryn óndirýshilerdiń qatysýymen jármeńke ótedi, dep habarlaıdy QazAqparat tilshisi.

SQO aýyl sharýashylyǵy jáne jer qatynastary basqarmasynyń málimetinshe, Astanada ótetin respýblıkalyq aýyl sharýashylyǵy jármeńkesine óńirdiń barlyq 13 aýdany jáne Petropavldyń kásipkerleri qatysady.

Qyzyljarlyq sharýalar ózderi óndiretin ónimniń barlyq túrin – et, jumyrtqa, sút ónimderin, kókónis, balyq, bal, makaron ónimderin aparmaq.

Jármeńge 8-9 qazan kúnderi Turan dańǵyly, 48 mekenjaıy boıynsha «Astana Arena» sport kesheniniń janyndaǵy alańda tańǵy saǵat 8.00-de bastalyp, keshki saǵat 18.00-ge deıin jalǵasady.

«Respýblıkalyq jármeńkege myń tonnadan astam azyq-túlik aparamyz. Bári tabıǵı, ózimizde shyǵarylatyn taza ónim. Daıyndyq jumystaryn júrgizdik. Bizben birge Aqtóbe oblysynyń kásipkerleri de óz ónimderin astana turǵyndary men qonaqtaryna usynady. Bul joly da suranys joǵary bolady dep oılaımyz», - deıdi SQO aýyl sharýashylyǵy jáne jer qatynastary basqarmasynyń basshysy Meıram Meńdibaev.

Ótken demalys kúnderi óz ónimderin astanalyqtarǵa Shyǵys Qazaqstan jáne Abaı oblystary usynǵan edi.

Mundaı aýqymdy jármeńke Petropavlda da ótpek. Ol 15 qazanǵa josparlanǵan. Ereksheligi – azyq-túlikten basqa jemazyq, shóp jáne saban satylatyn bolady. Baǵasy ádettegideı naryqtaǵydan 10-15 % arzanǵa usynylmaq.

Foto: gov.kz