Aldaǵy bes jylda jambyldyqtar 100 paıyz taza aýyz sýmen qamtylady

TARAZ. QazAqparat – Aldaǵy bes jylda Jambyl oblysynda taza aýyz sýmen qamtamasyz etý máselesi 100 paıyz sheshiletin bolady. Bul týraly energetıka jáne turǵyn úı-kommýnaldyq sharýashylyq basqarmasynyń basshysy Qudaıbergen Qorǵanbaev aıtty, dep habarlaıdy QazAqparat tilshisi.

Basqarma basshysynyń aıtýynsha oblystaǵy tórt qalada 394 myń turǵyn nemese 88 paıyz ortalyqtandyrylǵan aýyz sýmen qamtylǵan.

«Qalǵan qala turǵyndaryn aýyz sýmen qamtamasyz etý úshin Taraz qalasynda 6 joba, Shý qalasynda 8 joba ázirlenýde. Jalpy jobalar quny 9 mlrd teńge», -dedi Q.Qorǵanbaev.

Al, oblystyń aýyldyq eldi mekenderindegi turǵyndardyń 75 paıyzdan astamy ortalyqtandyrylǵan aýyz sýmen qamtamsyz etilgen. Jyl basynan beri 9 eldi mekende turatyn 13 100 adam ortalyqtandyrylǵan aýyz sýǵa qol jetkizgen. Bıyl 50 aýyz sýmen jabdyqtaý nysanynyń qurylysyna 17 mlrd teńgeden astam qarjy bólindi.

«Ótken jylmen salystyrǵanda aýyz sýmen qamtý salasyndaǵy jumystardyń kólemi 2,5 esege artyp otyr. 30 eldi mekende jańa aýyz sý qubyry salynyp, 10 aýylda qoldanystaǵy sý qubyry jóndelýde. Jyl sońyna deıin aýyl turǵyndaryn ortalyqtandyrylǵan sýmen qamtý deńgeıi 75,2-den 82,8 paıyzǵa jetetin bolady», - dedi Q.Qorǵanbaev.

Sondaı-aq, halyq sany 200-ge deıingi 36 eldi mekende sýdy tazartýdyń keshendi blok modýlderin ornatý kózdelýde. 78 eldi mekendi ortalyqtandyrylǵan aýyz sýmen qamtamasyz etýdiń 2021-2025 jyldarǵa arnalǵan jospary ázirlengen.

Qazirgi ýaqytta 39 eldi meken boıynsha jobalyq-smetalyq qujattama ázirlenýde. Jalpy óńirlik josparǵa sáıkes 2025 jylǵa deıin oblystaǵy qala jáne aýyl turǵyndaryn 100 paıyz aýyz sýmen qamtý josparlanyp otyr.

Sonymen qatar, Qudaıbergen Qorǵanbaev ázirlenip jatqan jobalardy Úkimet jedel túrde qarjylandyrýdy qoldasa, eldi meken turǵyndaryn tolyq aýyz sýmen qamtý deńgeıin 2023 jyly aıaqtaýǵa múmkindik bar ekendigin aıtyp ótti