Aldaǵy bes jylda elimizde shamamen 60 bordaqylaý alańyn qurý josparlanýda - «QazAgro» basshysy

ASTANA. 8 qarasha. QazAqparat /Qanat Mámetqazyuly/ - Elimizde aldaǵy bes jyl ishinde shamamen 60 bordaqylaý alańyn qurý josparlanyp otyr. Bul týraly búgin Parlament Májilisinde ótken Úkimet saǵatynda «QazAgro» ulttyq basqarýshy holdıngi» AQ Basqarma tóraǵasy Asyljan Mamytbekov málim etti.

Holdıng basshysynyń aıtýynsha, elimizdegi bordaqylaý alańdaryn qurý jobalary Ulttyq qordyń qarajaty esebinen qarjylandyrylatyn ınvestıtsııalyq baǵdarlamalar sheńberinde júzege asady. «Aǵymdaǵy jaǵdaıǵa sáıkes, jalpylama óndiris qýaty jylyna 6 myń tonna et óndirýge múmkindik beretin bordaqylaý alańyn qurý boıynsha 8 jobany qarjylandyrý maquldandy. Bundaı jobalardyń jalpy quny 12,8 mlrd. teńgeni quraıdy. Al aldaǵy bes jyl ishinde birjolǵy 150 myń bas nemese jylyna 300 myń bas mal ósiretin shamamen 60 bordaqylaý alańdaryn qurý josparlanýda», -dedi A. Mamytbekov.

Onyń aıtýynsha, atalǵan jobalardy júzege asyrýdyń nátıjesinde elimizde bes jyldan keıin shamamen 60 myń tonna et eksportqa shyǵarylsa, on jyldan keıin bul kórsetkish 180 myń tonna sıyr etine jetetindigi boljanýda.