Aldaǵy bes jylda elimizde eskirgen kólikter sany 2,5 mln. danadan asyp túsýi múmkin - A. Raý
ASTANA. 18 qarasha. QazAqparat - Aldaǵy bes jylda elimizde qoldanys merziminen asyp, ýaqyty jaǵynan eskirgen kólikter sany 2,5 mln. danadan asyp túsýi múmkin. Búgin Parlament Májilisindegi Qazaqstannyń DSU-ǵa kirý úderisterine arnalǵan Úkimet saǵatynda Indýstrııa jáne jańa tehnologııalar vıtse-mınıstri Albert Raý osylaı málimdedi.
«Biz Qazaqstannyń avtokólik naryǵy men avtomobıl parkteriniń jaǵdaıyna qatysty zertteý jumystaryn júrgizgen bolatynbyz. Osyǵan oraı, Qazaqstanda qazir 3,5 mln. mashına qoldanysta bolsa, sonyń 2 mln. danasynyń paıdalaný merzimi 17 jyldan joǵary. Al endi 5 jyldan soń bulardyń qatary 2,5 mln. danaǵa artady. Bul negizinen bir jyldary eski kólikterdiń elimizge kóptep ákelýinen oryn alǵan bolatyn. Aldaǵy ýaqytta bul problema oryndy sheshilmese qordalana berýi yqtımal», - deıdi A. Raý.
Bul rette kólikterdiń ýtılızatsııasyna nazar aýdarǵan vıtse-mınıstr, osy baǵyttaǵy júıe ázirlengenin atap ótti. Onyń aıtýynsha, qazir ýtılızatsııa máselesine qatysty eki-úsh túrli júıe tóńireginde áńgime bolyp jatyr. «Máselen, kólik ıesi eger onyń múlki tehnıkalyq baıqaýdan ótpese, onda bul tolyǵymen joıylýy kerek. Muny bıýdjetten qarastyramyz ba, álde ózin-ózi retteıtin júıe retinde qarastyramyz ba, sol jaǵy áli belgisiz», - dedi A. Raý.
