Aldaǵy bes jyl depýtattar men ákimderdiń jalaqysy óspeıdi - Prezıdent

NUR-SULTAN. QazAqparat – Memleket basshysy Qasym-Jomart Toqaev Májilistiń jalpy otyrysynda depýtattar men ákimderdiń eńbekaqysyn kóterýge besjyldyq moratorıı jarııalady, dep habarlaıdy QazAqparat.

«Úkimet músheleri men depýtattardyń jáne árıne ákimderdiń eńbekaqylaryn atap óteıin. Ótken jyldyń sońynda bul másele qoǵamda qyzý talqylandy. Negizi atalǵan sanattaǵy memlekettik qyzmetshilerdiń jalaqysy tolyǵymen jetkilikti dep sanaımyn. Sondyqtan Úkimet músheleriniń, óńirlerdiń ákimderiniń jáne depýtattardyń jalaqysyn kóterýge bes jyldyq moratorıı jarııalaýǵa bolady dep sanaımyn», - dedi Memleket basshysy Májilistiń jalpy otyrysynda.

Bul rette Prezıdent ákimshilik memlekettik qyzmetshiler men bıýdjettegilerdiń eńbekaqysyn ósirý jalǵasatynyn aıtty.

«Bul Májilis depýtattary úshin jaqsy jańalyq emes ekenin túsinemin, biraq sizder bul jańalyqty túsinistikpen qabyldaısyzdar dep oılaımyn. Ákimshilik memlekettik qyzmetshiler men bıýdjettegilerdiń eńbekaqysyn bıýdjet múmkindikteriniń ósýine qaraı arttyrýdy jalǵastyramyz», - dedi Qasym-Jomart Toqaev.